اسلام آباد۔ 22 اگست (اے پی پی) وزیر مملکت خزانہ و محصولات ڈاکٹر عائشہ غوث پاشا پارینے کہ حکومت جوان گام گیج آتا کمک اٹ زرگزران ءِ خواتہ مننگ نا خطرہ غاتیان بچفینے، روپئی نا قدر اتی ودکی مننگ ءِ وخت اس کہ درآمد کم مننگ ءِ، انسانی و اقتصادی سلامتی آن بیدس قومی سلامتی نا تصور بے پورو ءِ۔ اوداہیت ءِ دوشنبے نادے آ داڑے انسٹی ٹیوٹ آف سٹریٹجک سٹڈیز اٹی ’’پاکستان نا اقتصادی سلامتی۔۔ چیلنج و لائحہ عمل‘‘ نا سرحال آ اڈ ہلوک خصوصی رپورٹ نا جاری کننگ نا وخت آ تینا تران اٹی پارے۔ ڈاکٹر عائشہ غوث پاشا پارے کہ ساڑی آ دور اٹی اقتصادی و انسانی سلامتی آن بیدس قومی سلامتی نا تصور بے پورو ءِ۔ اقتصادی سلامتی کن پیشن نا زرتس کن سوگو بنداو بایدے مرے انتئے کہ ہر ملک انا شونداری و شونہالی ٹی اقتصادی سلامتی نا اہم ءُ کڑد اس مسنے۔ وزیر مملکت پارے کہ راجی ٹک آک اقتصادی سلامتی نا تعین ءِ کیرہ، انسانی و اقتصادی شونداری کن راج انا کم کٹیا والا و محروم تپہ غاتے مون آ دننگ المی ءِ انتئے کہ بیرہ ہندا حالیت اٹ پائیدار نمو ءِ ممکن جوڑ کننگ مریک۔ وزیر مملکت پارے کہ پاکستان اٹی پائیدار بنداو تیا اقتصادی نمو ممکن مننگ کتو، مستین اٹ کیہی وار اقتصادی نمو و سست روی (بوم بسٹ) نا دور بسنے، داحالیت آتیٹی حکومت آتے چندی دور تیٹی آئی ایم ایف و کمکار فراوان کروک آ ادارہ غاتیا ہنوئی تما۔ وزیر مملکت خزانہ پارے کہ انسانی سلامتی کن پائیدار زرگزرانی شونداری و نمو المی ءِ ، پائیدار اقتصادی شونداری و نمو کن قومی، راجی و چاگڑدی سیکورٹی آ مبنی وڑوڈول اس اختیار کروئی مریک۔ اوپارے کہ زرگزرانی شونداری و سلامتی نا بابت پیشن نا پڑ اہم ءِ، حکومت جوان گام گیج آتا کمک اٹ زرگزران ءِ خواتہ مننگ نا خطرہ غاتیان رکھانے۔ روپئی نا قدر اٹی ودکی مننگ ءِ وخت اس کہ درآمد کم مننگ ءُ، ننتون زرمبادلہ نا کوڑیک کم ءُ ولے ڈیفالٹ نا خطرہ اف، نن بروک آ سال اکن پیشن نا زرتس ءِ رکھ کرینن۔ حکومت حالیت آتیا سخت نظر شاغانے، روپئی ناقدر اٹی ودکی مس، درآمدی بل ءِ کم کننگانے۔ اوپارے کہ واپاری نسخان و وام تا زرتس اہم چیلنج ءُ ولے حکومت دا بابت گام گیج کننگ ءِ، ننا گڑاس سرسہبی رسینگانے ولے اوفتے ننے پائیدار بندا و تیا گدریفوئی ءِ، ننے بھاز گڑاکروئی ءِ ، دامسخت کن زرگزران نا پنجر اٹی اصلاحات المی ءِ، بوم بسٹ سائیکل آن پیش تمنگ کن ننے 2 آن مسہ سال اٹی اصلاحات نا عمل ءِ مون آ دروئی ءِ۔ وزیر مملکت ملکی شونداری و شونہالی ٹی وسیلہ و کچ اٹی ودکی نا گرج آ ہم زور شاغا۔ اوپارے کہ پائیدار شونداری و نمو کن ننے تینا وسیلہ غاتے متحرک کروئی مریک، خراج آتا دنگ و بنداو اٹی گیشتری المی، دامسخت کن انتظامی و اصلاحی گام گیج آتا عمل ءِ برجاتخوئی مریک۔ خراج پالیسی ساز آتا کڑد ہم دا بابت بھاز اہمیت تخک۔
