اسلام آباد۔ 22 اگست (اے پی پی) بنجائی وزیر حوالکاری و شینکاری مریم اورنگزیب پارینے کہ فلم و راگ پاکستان نا جہانی کہول آ تشخص ءِ گچین جوڑ کننگ اٹ اہم ءُ کڑد اس ادا کننگ کیک، فلم آتا قصہ ، آب و ٹیکنالوجی ءِ گچین کننگ ننا قومی فلم پالیسی نا بشخ اسے، آب اٹ فلم آتا داوخت آ بھاز گرج ءِ، فلم انڈسٹری ءِ ٹیکنالوجی و پوسکن آ خواست آتون ہم گرنچ کینہ، حکومت سینما گھر تا بحالی، پوسکن آ سینما گھر تا تفنگ و فنکار آتے آسودہی تننگ کن عملی گام گیج کننگ ءِ، حکومت دا رداٹ فلم جوڑ کروک آتے خراج اٹ استثنیٰ تون اوار فلم انڈسٹری کن ازباب آتا درآمد اٹی ہرممکن کمک فراوان کیک۔ داخیال آتا درشانی ءِ او دوشنبے نادے آ داڑے پاکستان فلم پروڈیوسرز ایسوسی ایشن نا چیئرمین شیخ امجد نا کماشی ٹی اوڑدہی کن بروک آ ڈل اتون گپ وتران کرسا پارے۔ بنجائی وزیر حوالکاری پارے کہ فلم انڈسٹری آ خلوک ود ہولڈنگ خراج نا چٹفنگ کن ایف بی آر تون گپ وتران برجاءِ، زوت لائحہ عمل اس طے کننگک۔ اوپارے کہ پوسکن آ سینما گھر و پروڈکشن ہاؤس آتے خراج اٹ رعایت تننگ کن تعلقدار کمامدارآتون گپ وتران نا عمل برجاءِ۔ بنجائی وزیر حوالکاری پارے کہ فلم انڈسٹری نا غٹ اسٹیک ہولڈر آتون خراج استثنیٰ تون اوار ایلو امور آ بھاز زوت سلابت کننگک۔ اوپارے کہ حکومت زمواری ءِ سنبھالنگ تون فلم اینڈ کلچر پالیسی ءِ بحال کرے، نن فلم ءِ صنعت نا درجہ تسن۔ اوپارے کہ پاکستانی و چینی فلم جوڑ کروک آتا اسیجائی پروڈکشن اس بناکننگ کن کوشست آتے ترند کننگک۔ اوڈل ءِ پاکستان و چین نا نیام اٹ فلم جوڑ کننگ اٹ کمک و اسیجائی پروڈکشن نا بابت چینی سفیر تون مروک آ گپ وتران آن ہم معلومدار کرے۔ داوخت آ گپ وتران کرسا چیئرمین فلم پروڈیوسرز ایسوسی ایشن شیخ امجد پارے کہ سینما انڈسٹری نا بحالی کن حکومتی گام گیج آتیان فلم انڈسٹری ءِ سوگوی ملک۔ اوپارے کہ پاکستان فلم انڈسٹری ءِ اونا اسل شناخت ءِ ترفنگ کن حکومت تون اواری اٹ کاریم کیک۔ ڈل بنجائی وزیر حوالکاری و شینکاری ءِ فلم انڈسٹری ءِ مون تروک ویل آتیان ہم معلومدار کرے۔ بنجائی وزیر ڈل انا خواست، ویل و اوفتا ایسری کن ہرممکن گام گیج آتا باور کرفے۔ فلم پروڈیوسر ز ایسوسی ایشن نا ڈل فلم انڈسٹری نا بحالی کن بنجائی وزیر حوالکاری مریم اورنگزیب نا گام گیج آتا ستاءِ کرے۔
