اسلام آباد۔ 22 اگست (اے پی پی) سی پیک ڈٹ انا رداٹ سکھی کناری ہائیڈرو پاور پروجیکٹ اٹ آخیریکو سٹیٹر ءِسرسہبی اٹ خلنگا، دا ڈٹ 2023 نا ایسر یا 2024نا نیام اسکان پورو مننگ نا گمان ءِ، داڑآن سالانہ کم و ود 3 ارب یونٹ اڑزآن بجلی قومی گریڈ اٹی اوار مریک۔ سکھی کناری ہائیڈرو پاور پروجیکٹ نا کمامدارآک پاریر کہ سکھی کناری ہائیڈرو پاور پروجیکٹ اٹ آخیریکو سٹیٹر فریم ءِ سرسہبی اٹ خلنگانے و اودے شیف یونٹ اٹ شاغنگانے۔ سٹیٹر نا وزن 335 ٹن ئسک و دا کاریم ءِ پل کرین نا کمک اٹ پورو کننگا۔ دا ڈٹ اٹی 884 میگاواٹ نا اسیجائی لائخی اتون چار بجلی ودی کروک آ یونٹ ءِ۔ چین پاکستان اقتصادی راہداری (سی پیک ) نا رداٹ رن آف ریور آسراتی زوت پورو مروک آ صاف توانائی نا ڈٹ آتیان اسٹ ءِ۔ چین نا گیزوباگروپ کم و ود 2 بلین ڈالر نا خڑچ آن دا ڈٹ ءِ تفنگ ءِ۔ دا ڈٹ 2023 نا ایسر یا 2024 نا نیام اسکان پورو مننگ نا اومیت ءِ۔ ڈٹ انا پاور ہاؤس و ریزروائر نا بشخ پوروی نا بڑزکو ریسہ غاتیٹی ءِ۔ ولے 24 کلومیٹر مرغن ہیڈریس ٹنل سخت انگا ڈغار، یخ آتیٹی سخت موسمی حالیت و دیر انا کشنگ نا ویل آتا سوب آن دا ڈٹ انا غٹ آن مشکل بشخ ءِ۔ گیزوبا سرنگ نا جاگہ غاتیا بھاز کسبکار افرادی قوت و پوسکن آمشینری تعینات کرینے و داوخت آ خُتنگ و لائننگ نا کاریم شیف و بڑز ہڑتوم آ کنڈآ برجاءِ۔ دا ڈٹ پوروی آن پد سالانہ کم و ود 3 بلین یونٹ اڑزآن بجلی نیشنل گریڈ اٹی اوار کیک۔
