اسلام آباد۔ 22 اگست (اے پی پی) مسلم لیگ (ن) نا راہشون محسن شاہنواز رانجھا پارینے کہ ہرا پارہ کہ عمران خان چیئرمین نیب آ زور شاغسا تینا برخلاف جاست وپاست ءِ تورفے ، آئین و کانود نا ہیت ءِ کروک آ تینٹ اونا پرواہ ءِ کپک، توشہ خانہ کیس پبلک اکاؤنٹس کمیٹی آ ہم دینہ۔ دوشنبے نادے آ الیکشن کمیشن نا پیشن میڈیا تون گپ وتران کرسا اوپارے کہ عمران خان توشہ خانہ غان ہرا ٹیکی تے ہلک ، اودے مروسس کہ اوفتا سرجم آتے تینا گوشوارہ غاتیٹی ہم پاش کروسس۔ دا ٹیکی تے گوشوارہ غاتیٹی پاش کننگتو بلکن اوفتے ڈکنگ نا کوشست کننگا۔ اوپارے کہ عمران خان الس ءِ خلفاراشدین نا مثال ترسا کرے ولے تینٹ دُزی کرسا کرے۔ اوکروڑ آ روپئی نا گڑاتے توشہ خانہ غان دوئی کرے و پاش کتو۔ او ہر باندات ءِ اسلامی ٹچ تننگ نا کوشست کیک، وخت اس او آئین نا بالادستی نا ہیت ءِ کیک ولے داگڑاک اونا خڑک آن ہم گدرینگپسہ۔ اوپارے کہ ریاست مدینہ نا دعویٰ کروک توشہ خانہ غان 35 ہزار روپئی ٹی آئی فون ءِ دوئی کرے۔ اوپارے کہ عمران خان نا بیان و عمل اٹی تضاد ءِ۔ اوتوشہ خانہ غان ہلوک آ ٹی سیٹ نا نہاد 3500 روپئی پاش کرے۔ عمران خان آئین و کانود نا ہیت ءِ کیک ولے تینٹ اونا پاسداری ءِ کپک۔ توشہ خانہ سکینڈل پارلیمنٹ نا پبلک اکاؤنٹس کمیٹی آ دینہ کانہ، ہراک پارہ کہ خان دُز اف او توشہ خانہ کیس انا سرجم آتے خوانر۔ عمران خان ءِ الیکشن کمیشن اٹ جمع کرفوک آ تینا گوشوارہ غاتا سرجم نا ہم سمااف عمران خان 8 سال اسکان چندی پٹیشن داخل کرسا فارن فنڈنگ کیس ءِ تاخیر نا گواچی کرسا کرے، داسہ او توشہ خانہ کیس اٹی ہم ہندا ترکیب ءِ کاریم اٹ اتنگ خواہک۔
