اسلام آباد۔ 22 اگست (اے پی پی) بنجائی وزیر قومی جان جوڑی عبدالقادر پٹیل پارینے کہ مچ آملک انا 86 ضلع غاتیٹی اینخو سال انا مسٹ میکو پنچ دے ئی قومی انسداد پولیو مہم دوشنبے آن بناکرینے، مہم اٹی 43.3 ملین چناتے پولیو آن بچفنگ نا پڑی کنفنگ نا ہدف ءِ مقرر کننگانے۔ دوشنبے نادے آ وزارت جان جوڑی آن جاری بیان نا رداٹ بنجائی وزیر پارے کہ ہندا انسداد پولیو مہم سویلی خیبرپختونخوا و کراچی ٹی 15 اگست آن برجاءِ وخت اس کہ بلوچستان اٹی انسداد پولیو مہم 29 اگست آن بناکیک۔ اوپارے کہ وزیراعظم مہالو آن انسداد پولیو مہم نا بناءِ کرینے۔ اوپارے کہ ہندا انسداد پولیو مہم اٹی 43.3 ملین چناتے پولیو آن بچفنگ نا پڑی کنفنگ نا ہدف ءِ مقرر کننگانے۔ بنجائی وزیر پارے کہ اسلام آباد اٹی پولیو مہم اٹی 3 لکھ 92 ہزار فرنٹ لائن ورکر بشخ ہلنگ ءُ۔ اوپارے کہ بنجائی ، صوبائی حکومت و ضلعی انتظامیہ مہم نا سرسہبی کن لگوک ءُ۔ اوپارے کہ فرنٹ لائن ورکرآک ننا قومی ہیروک ءُ۔ اوپارے کہ دا موذی مرض انا چٹفنگ کن حکومت غٹ تر وسیلہ غاتے کاریم اٹ اتنگ ءِ۔ عبدالقادر پٹیل لمہ و باوہ غاتیان خواست کرے کہ غٹ لمہ و باوہ مہم نا سرسہبی ٹی تینا پبی کڑد ءِ ادا کیر۔ اوپارے کہ پولیو دین ننا چاگڑد اٹی ساڑی ءِ۔ اوپارے کہ انسداد پولیونا ہر مہم اٹی چناتے پولیو آن بچفنگ نا پڑی ضرور کنفنگے۔ اوپارے کہ ٹال فری جان جوڑی رکھ ہیلپ لائن 1166 آ لمہ و باوہ غاتا راہشونی ءِ کننگ انگ ءِ۔
