اسلام آباد۔ 18 اگست (اے پی پی) حکومت ملک اٹی ہلہلہ ئی بنداو تیا کشاری اصلاحات نافذ کننگ نا فیصلہ کرینے وخت اس کہ وزیراعظم محمد شہباز شریف پارینے کہ حکومت اولیتی بنداو تیا بزغرآتے المی آسراتی فراوان کیک، بزغرآتے بے آب اٹ بج و پیسٹی سائیڈ بہاکروک آ کمپنی تا سدباب ءِ کننگک، بزغرآتے کشت وکشار نا جہانی کہول آ رواج پوسکن آ وڑوڈول آن روشناس کرفنگ کن جوان آگاہی مہم اس چلیفنگے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف نا کماشی ٹی ملک اٹی کشاری بشخ انا اصلاحات آ بڑزکو کہولی دیوان اس اڈہلک۔ دیوان اٹی بنجائی وزیر طارق بشیر چیمہ، احسن اقبال، مریم اورنگزیب، مفتاح اسماعیل، خصوصی کمکار احد چیمہ، محمد جہانزیب خان وخت اس کہ غٹ صوبہ غاتا سیکرٹریک کشت وکشار ویڈیو لنک انا کمک اٹ دیوان اٹی بشخ ہلکر۔ دیوان اٹی کشاری اصلاحات کن چندی بشخ آتا ہشت سب کمیٹی تا وزیراعظم ءِ سلاہ و سوج پیش کننگا، دا سلاہ و سوج آتیٹی گونڈ، نیام و مرس مدتی جوان ڈٹ بندی اوار۔ دیوان آن تران کرسا وزیراعظم پارے کہ حکومت اولیتی بنداو تیا بزغرآتے المی آسراتی فراوان کیک۔ حکومت بزغر آتے کم خڑچ آ وخت آ آب اٹ بج ، کھد انا فراوانی ءِ پک کیک۔ بزغرآتے بے آب اٹ ج و پیسٹی سائیڈ بہاکروک آ کمپنی تا سدباب ءِ کننگک۔ وزیراعظم پارے کہ ہندی کہول آ آب اٹ بج انا پیدوار کن کشاری پٹ وپولی ادارہ غاتے آسراتی فراوان کننگک۔ حکومت بزغر آتے پوسکن آ مشینری و وام تیٹی آسراتی نا فراوانی ءِ پک کیک۔ حکومت خولم و کشاری غلہ غاتے کوڑی کننگ کن سائیلوز نا تفنگ نا کاریم کیک۔ خولم نا فصل انا دسنگ آن مست پیدوار اٹی فی ایکڑ پک ودکی کن گام گیج کننگے۔ وزیراعظم پارے کہ پک کننگے کہ کشاری مداخل آ حکومت نا کنڈآن سبسڈی بزغرآتسکان رسینگے۔ کشاری ڈٹ بندی ٹی موسمیاتی بدلی نا اثرآتے ہم مون آتخنگے۔ بزغرآتے کشت وکشار نا جہانی کہول آ رواج پوسکن آ وڑوڈول آن روشناس کرفنگ کن جوان آگاہی مہم اس چلیفنگے۔ دیوان اٹی وزیر اعظم ءِ خولم، کرپاس، کنوئی آتیل، کھد، کشاری پٹ وپول، کشت وکشار اٹی دیر انا کاریم اٹ اتنگ، موسمیاتی بدلی و کشاری مشینری نا بابت جوڑ سب کمیٹیک سرجمی اٹ حوال تسر و تینا سلاہ و سوج آتے پیش کریر۔ دیوان اٹی آخبت خولم، کرپاس و کنوئی آ تیل انا پیدوار کن گام گیج، بزغرآتے کم خڑچ آ پوسکن آ مشینری ، یوریا و ڈی اے پی آ سبسڈی، گمانی پیدوار و درآمد، آب اٹ بج، دیر انا گچین کاریم اٹ اتنگ و بزغر آتے وخت آ وام تا فراوانی نا بابت سلاہ و سوج پیش کننگا۔ وزیراعظم پارت کرے کہ غٹ تعلقدار وزارت آتے دا سلاہ و سوج آتیان آخبت فصل اکن ہلہلہ ئی بنداو تیا کشاری اصلاحاتی پلان اس مرتب کیر۔ وزیراعظم 2 دے انا تہہ ٹی دا پلان ءِ پیش کننگ نا پارت جاری کرے۔ وزیراعظم بھاز زوت ملک اٹی کشاری اصلاحات کن جوان ڈٹ انا پڑو ءِ کیک ہراڑآن نئے بیرہ بزغرآک شونہال ، ملکی کشاری پیدوار اٹی ودکی و کشاری اجناس نا درآمد اٹی خاطرخواہ کمتی واقع مریک۔
