اسلام آباد۔ 18 اگست (اے پی پی ) وزیراعظم شہباز شریف سویلی سندھ اٹی بشام نا پرتیٹی نوکاپ آن مروک آ جانی و مالی نسخان آ ڈکھیائی نا درشانی ءِ کرے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پی ڈی ایم اے ، این ڈی ایم اے و صوبائی حکومت ءِ دمدستی وڑاٹ زہمی علاقہ غاتیتی کمکی کارروائی تے ترند کننگ نا پارت کرینے۔ وزیراعظم پارے کہ نوکاپی حالیت آتیٹی اولیکو اولیت زہمی مخلوق نا ریسکیو و اوفتا دمدستی کمک ءِ۔ وزیراعظم پارت کرے کہ زہمی تے دمدستی وڑاٹ 50 ہزار روپئی فی خاہوت فراوان کننگے۔ زہمی تے کن و خور و ساف دیر انا دمدستی فراوانی ءِ پک کننگے۔ زہمی تے ہنکینی و طبی آسراتی تا دمدستی فراوانی ءِ پک کننگے۔ وزیراعظم ملک انا ایلو بشخ آتیٹی ہم پِر تیٹی گمانی نوکاپی حالیت آتون مون تننگ کن تعلقدار ادارہ غاتے تیار سلنگ نا پارت ہم کرے۔
