اسلام آباد۔ 18 اگست (اے پی پی) صدر مملکت ڈاکٹر عارف علوی ملک گیر شجرکاری کن اسیجائی کوشست آتاگرج آ زور شاغسا پارینے کہ جنگل آتیٹی ودکی آن پائیدار شونداری نا مون آ دننگ، ملک ءِ چاگڑد دوست جوڑ کننگ و بروک آ چین تا آخبت ءِ رکھ کننگ اٹ کمک رسینگک، ملک انا ہر شاری شجرکاری مہم اٹی پبی بشخ ہلے، درخت خلے و اوفتا خیال ءِ ہم تخے۔ نن اسیجائی کوشست آتے اٹ موسمیاتی بدلی نا اثر آتے کم کننگ و پاکستان ءِ اسہ سرسوز و شاداب ملک اس جوڑ کننگ اٹ سرسہب مرینہ۔ قومی بشام نا شجرکاری مہم نا بناآ تینا کلہو اٹی اوپارے کہ موسمیاتی بدلی و جہانی درجہ حرارت اٹی ودکی دنیا نا چندی بشخ آتیٹی گلیشیئر نا دیر مننگ ونوکاپ نا سوب جوڑ مننگ ءِ۔ پاکستان نا چاگڑدی نظام ہم موسمیاتی بدلی، گلوبل وارمنگ و جنگل آتا گڈنگ نا سوب آن خطرہ نا گواچی ءِ۔ اسہ ساڑی رپورٹ اسے نا رداٹ پاکستان موسمیاتی بدلی آن غٹ آن زیات زہمی مروک آ ہشت میکو ملک ءِ۔ پاکستان، فلپائن و ہیٹی کون آ ملک آتے گیشتر قدرتی آفت آتا مون تروئی تمک۔ پاکستان ءِ جہانی حدت و موسمیاتی بدلی تا سوب آن کم وود ہرسال نوکاپ کون آ حالیت آتا مون تروک مریک و ارب آ روپئی نا نسخان ہم سگوئی تمک۔ اوپارے کہ اسہ اندازے سے نا رداٹ تدوک آ 19 سال اٹی پاکستان ءِ چاگڑدی بدلی تون منسلک 173 واقعہ غاتا مون تروئی تما و داسال ہم پاکستان ءِ نوکاپی حالیت و پِر تا سوب آن بھس کاری مون تروک ءِ۔ داوڑنا حالیت آتیٹی ایلو گام گیج آتیان بیدس زیات آن زیات درخت خلنگ و شجرکاری مہم آن پاکستان نا قدرتی چاگڑد نا رکھ، جنگل آتیٹی ودکی و جہانی حدت نا اثرآتے کم کننگ اٹ کمک ملنگ کیک۔ صدر مملکت پارے کہ جہانی آب انا رداٹ ہر ملک انا جنگل آتا رقبہ کم و ود 25 درسد بایدے مرے وخت اس کہ جہانی بینک انا سال 2020ء نا رپورٹ نا رداٹ پاکستان اٹی جنگل آتا رقبہ کم وود 4.8 درسد ءِ۔ ننے پاکستان اٹی زیات آن زیات جنگل خلنگ کن تینا کوشست آتیٹی پین ترندی اتوئی مریک۔ اوپارے کہ کنے دا پاننگ تون خوشی محسوس مننگ ءِ کہ پاکستان اٹی دہ ارب ٹری سونامی ڈٹ آ کاریم برجاءِ و دا پاکستان نا تاریخ اٹی شجرکاری نا غٹ آن بھلا ڈٹ ءِ۔ دا ڈٹ انا رداٹ جون 2022 ء اسکان 1.81 ارب نیال خلنگانے و سال 2023ء اسکان 3.29 ارب درخت خلنگ نا قومی ہدف ءِ پورو کننگک۔ صدر پارے کہ کنکن دا ہیت خوشی نا سوب ءِ کہ ایوان صدر نا دنگ اٹی تدوک آ سال شجرکاری مہم نا رداٹ 10 ہزار نیال خلنگا و داسال ہم پین نیال خلنگ انگ ءِ۔ داکان بیدس، ایوان صدر اٹی گرین پریذیڈنسی ڈٹ انا رداٹ 1.5 ایکڑ رقبہ غا میاواکی جنگل ہم خلنگا۔ اوپارے کہ داوڑنا گام گیج نئے بیرہ چاگڑد ءِ ساف تخنگ بلکن پاکستان ءِ سرسوز و شاداب و ساف جوڑ کننگ اٹ ہم کمک فراوان کیک۔ داکان بیدس، جنگل آتیٹی ودکی آن نوکاپ نا برخلاف گچین بچفنگ ہم دوئی مریک۔ صدر مملکت پارے کہ درخت خلنگ آن قدرتی حیات نا رکھ، ملکی نباتات و حیوان تے رکھ تخنگ اٹ ہم کمک رسینگک۔ اوپارے کہ دا سال انا قومی شجرکاری مہم اٹی ننے غٹ ءِ اواری اٹ کاریم کننگ نا گرج ءِ۔ ای اومیت کیوہ کہ پاکستان نا ورنا چین زیات آن زیات بشام نا شجرکاری مہم اٹ بشخ ہلے۔ای مچ آ قوم آن خواست کیوہ کہ او ہنکینی علاقہ، بازار، سڑک و صنعتی علاقہ غاتا خڑک زیات آن زیات درخت خلیر ۔ ہر شاری شجرکاری مہم اٹی پبی بشخ ہلے، درخت خلے و اوفتا خیال ءِ تخے۔ کنے پکا یخین ءِ کہ ننا اسیجائی کوشست آتیان نن موسمیاتی بدلی نا اثرآتے کم کننگ و پاکستان ءِ اسہ سرسوز و شاداب ملک اس جوڑ کننگ اٹ سرسہب مرینہ۔
