اسلام آباد۔ 18 اگست (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ سی پیک پاکستان کن سرسہب ڈٹ و گیم چینجر اسے، سی پیک نا رداٹ توانائی و انفراسٹرکچر نا ڈٹ آتیٹی چین کمک کرسا آئرن برادر مننگ نا شاہدی ءِ تس، زرگزران ءِ ریڈزون آن کشنگ اٹ سرسہب مسونن، داسہ زرگزرانی بحالی آ کاریم کننگ اُن، سخت چیلنج آتیان پد ہم نن زرگزرانی اڑاند آتے عبور کرسا ملک ءِ شونداری نا کسر آ دننگ اٹ سرسہب مسونن، خودساختہ فلسفی تا جوڑ کروک زرگزرانی بے سہبی نا داستان دم تسنے۔ داخیال آتا درشانی ءِ او پنچ شنبےنادے آ سی پیک نا دود آن تران کرسا کرے۔ بنجائی وزیر پارے کہ سی پیک پاکستان کن سرسہب و گیم چینجر ڈ ٹ اسے، پاکستان 2014 ٹی سی پیک نا رداٹ 29 ارب ڈالر نا زرکاری ءِ ممکن کرسا دنیا ءِ حیران کریسس، اوپارے کہ 2013ٹی 18 آن 20 گھنٹہ لوڈشیڈنگ ئسک، دہشت گردی ترند ئسک، اسہ زرکار اس ہم پاکستان آ بننگ خواتوکہ ہموتم چین تینا زرکار آتے داڑے گدریفسا سنگت مننگ نا شاہدی تس۔ چینی صدر نا دورہ نا وخت آ 46 ارب ڈالر نا زرکاری نا معاہدہ کرے۔ اوپارے کہ داوخت آ پاکستان نا بارواٹ دنیا نا سلاہ بدل مس و ارب آ ڈالر آتا زرکاری بس ہراڑآن توانائی نا کمتی ءِپورو کننگ اٹ کمک رسینگا۔ اوپارے کہ سی پیک نا رداٹ توانائی و انفراسٹرکچر نا ڈٹ آتیٹی چین کمک کرسا آئرن برادر مننگ نا شاہدی ءِ تس۔ کولا غان بجلی ودی کننگ نا ڈٹ آتیٹی پوسکن آ ٹیکنالوجی کاریم اٹ بس ہرافتیان چاگڑدی کچٹی مفک۔ اوپارے کہ سی پیک نا رداٹ قابل تجدید توانائی نا ڈٹ لگا ہرافتے ٹی سولر ونڈ، ہارئیڈرل ، و ایلو ڈٹ آک اوار ءُ۔ سی پیک نا غٹ ڈٹ آک فنانسنگ نا ءُ وام افس۔ تھر انا کولانا کوڑی 400 سال اسکان توانائی فراوان کننگ کیک اوڑآن اڑزآن بجلی ودی کننگ اُن۔
