اسلام آباد۔ 18 اگست (اے پی پی) بنجائی وزیر موسمیاتی بدلی سینیٹر شیری رحمان پارینے کہ جمہوری دور اٹی میڈیا غا پابندی تا بابت توازن اختیار کننگ نا گرج ءِ ، غٹءِ فیئر ٹرائل نا حق دوئی ءِ، پی ٹی آئی امریکہ نا برخلاف نعرہ خلک، اونا لابنگ فرم اتون معاہدہ کرے، پنجاب حکومت پولیس آفیسر آتا بدلی ءِ کرسا تینا سیاست ءِ کننگءِ۔ پنچ شنبےنادے آ بڑزکو ایوان نا دیوان اٹی گپ وتران کرسا سینیٹر شیری رحمان پارے کہ جمہوری دور اٹی میڈیا غا پابندی تا بابت توازن اختیار کننگ نا گرج ءِ، غٹ ءِ فیئر ٹرائل نا حق دوئی ءِ، آصف علی زرداری بھلو وخت اس زندان اٹی گدریفے، فریال تالپور ءِ نوک انا نن بکتر بند گاڈی ٹی ہرفسا دننگا، مریم نواز ءِ ہرفنگا، زالبول آتے خاص رعایت تننگتو، اوفک تینا زنچک اٹ ہلیر ہریر۔ انت دا کانود آن ایڑتر ءِ۔ اوپارے کہ راجن پور، ڈی جی خان و بلوچستان اٹی نوکاپ بھسکاری کرینے ، پاک فوج ہرانا برخلاف داٹرینڈ چلیفرہ او کمکی سرجزآتیٹی لگوک ءِ، پنجاب حکومت پولیس آفیسر آتا بدلی ءِ کرسا تینا سیاست ءِ کننگ ءِ، فیصل آباد اٹی برام آن انکار آ مسڑ آ بیدادی کننگا، دا باندات آ تو اسہ پولیس آفیسر اس ہم بدل متو، سیاسی مسخت کن اڈیالہ زندان نا آفیسر آک بدل مسر، پرامن برانز غٹ انا حق ءِ، دا لانگ مارچ کننگ کپسہ، چیئرمین بلاول بھٹو زرداری لانگ مارچ کرے، اسہ پنہ اس ہم پنیتو، دا بیدس بیساکھی آن سیاست کرسا نشان ایتر۔ اوپارے کہ پی ٹی آئی امریکہ نا برخلاف نعرہ خلک، اونا لابنگ فرم تون معاہدہ کرے، دا فرم مسکوہی سی آئی اے اسٹیشن چیف انا ءِ اوسچ اتون بایدے مون ایتے۔ اگہ دا دروغ اسے تو الس ءِ پائے۔ پی ٹی آئی وام ہلک ہرانا سوب آن ملک اٹی کبینی ءِ، دا دروغ تڑنگ آ قوم آن معافی خوار، اوفتا دروغ انا سوب آن زرگزران و خارجہ پالیسی ءِ نسخان رسینگا، سنگت ملک آک ناراض مسر، اوفتے ورندی تروئی مریک، اگہ امریکہ نا برخلاف غم و غصہ ئسک تو ولدا لابنگ فرم اتون انت اکن معاہدہ؟ دا دُز و داڑیل پیش تمانو، دا دُزی و سینہ زوری کننگ ءُ، نن عدالت آتون مون تسونن ۔
