اسلام آباد۔ 18 اگست (اے پی پی) بنجائی وزیر حوالکاری و شینکاری مریم اورنگزیب عمران خان نا میڈیا سیمینار ءِ منافقت گوندسا پارینے کہ میڈیا دشمن ہرامون اتون میڈیا سیمینار کرفنگ ءِ، اودے شرم برے، عمران خان میڈیا نا معاشی قتل ءِ کروک آ ڈوہدار ءِ، سی پی این ای، انٹرنیشنل میڈیا واچ و رپورٹرز ود آؤٹ بارڈرنا رپورٹ عمران خان نا میڈیا دشمنی نا شاہدی ءُ۔ پنچ شنبے نادے آ تینا اسہ بیان اسے ٹی او پارے کہ عمران خان نا دور میڈیا کن تہار ءُ دور اس ئسک، عمران خان وزیراعظم نا کرسی آ تولسا میڈیا دشمنی کرے، او دروغ، کرپٹ ، فارن ایجنٹ، میڈیا دشمن و منافق اسے۔ میڈیا ءِ فیصلہ کروئی ءِ کہ میڈیا نا برخلاف نیب ءِ کاریم اٹ اتوک آ نا سیمینار آ ہنوئی ءِ کہ آخا۔ اوپارے کہ میڈیا ءِ فیصلہ کروئی مریک کہ پاکستان میڈیا ریگولیٹری اتھارٹی نا بانی نا میڈیا سیمینار آ ہنوئی ءِ کہ آخا۔ اوپارے کہ چارسال میڈیا نا قتل ءِ کروک آ میڈیا سیمینار کننگ نا تماشہ کپ، عمران خان میڈیا ءِ نزور کننگ کن میر شکیل الرحمان نا برخلاف نیب گردی کرے۔ اوپارے کہ پی ایف یو جے، سی پی این ای و پی بی اے ءِ فیصلہ کروئی مریک کہ میڈیا ءِ نزور کروک آنا سیمینار آ ہنوئی ءِ کہ آخا، میڈیا ءِ فیصلہ کروئی مریک کہ صحافت نا خون، صحافی تے سم اٹ خلوک آ، میڈیا نا زبان بندی کروک آتا میڈیا سیمینار اٹ ہنوئی ءِ کہ آخا۔ اوپارے کہ میڈیاءِ فیصلہ کروئی مریک کہ ہرادے جہانی ادارہ غاک میڈیا پریڈیٹر نا خطاب تسنو، اونا سیمینار اٹی ہنوئی ءِ کہ آخا۔ اوپارے کہ میڈیا ءِ فیصلہ کروئی مریک کہ اوفتا آجوئی و نوکری ءِ پلوک آنا سیمینار نا تماشہ ءِ منوئی ءِ کہ آخا۔ بنجائی وزیر حوالکاری پارے کہ سی پی این ای نا 2020، انٹرنیشنل میڈیا واچ و رپورٹرز ود آؤٹ بارڈرز (آرایس ایف 2021) نا رپورٹ عمران خان نا میڈیا دشمنی نا شاہدی ءِ۔ عمران خان چار سال وزارت عظمیٰ نا کرسی آ تولسا میڈیا دشمنی کرسا کرے، انٹرنیشنل میڈیا واچ عمران خان ءِ فاشٹ گوندانے، عمران خان چار سال اٹی صحافی تا تَرک آتے پرغا، برمتہ کرے، میڈیا نا آجوئی ءِ لتاڑا، پارلیمان ءِ قلف خلفے، عمران خان میڈیا ءِ نیب انا کمک اٹ کنٹرول کرے و میڈیا ورکرآتے بے روزگار کرے۔ اوپارے کہ میڈیا ءِ فیصلہ کروئی مریک کہ صحافی تیان قلم ءِ پلوک آ، سکرین آن غیب کروک آ، نوکری ءِ پلوک آنا سیمینار اٹی ہنوئی ءِ کہ آخا۔
