اسلام آباد۔ 18 اگست (اے پی پی) وزیر مملکت کانود وانصاف سینیٹر شہادت اعوان پارینے کہ اسلام آباد اٹی 117غیرکانودی کو آپریٹیو ہاؤسنگ سوسائٹی ءِ نوٹس جاری کننگانے، ہائی کورٹ نا اسہ کمیشن اس ہم جوڑ کرینن، ہاؤسنگ سوسائٹی تا نوراکشتی و کرپشن ءِ چٹفنہ، مخلوق تون بیدادی کروک آ ک زندان تیا کارہ۔ پنچ شنبے نادے آ بڑزکو ایوان نا دیوان اٹی وقفہ سوج آتیٹی سینیٹر اعظم سواتی، سینیٹر فوزیہ ارشد و سینیٹر مولانا عبدالغفورحیدری نا سوج آتا ورندی ٹی اوپارے کہ تدوک آ پونے چار سال اٹی حکومت غیرکانودی ہاؤسنگ سوسائٹی تا برخلاف ہچ ءُ کارروائی اس کتو، اسلام آباد اٹی کوآپریٹیو ہاؤسنگ سوسائٹی تا سالانہ آڈٹ مریک، ہر غاو آ کارروائی کننگ حکومت نا زمواری ءِ ، سوسائٹیک زیات ڈغار پاش کرسا کم آ ہلیرہ، اسہ ایلو تون ہم نوراکشتی کرسا کیرہ، نن اودے چٹفنہ، الس ءِ ہم معلومدار کننگ اُن کہ او غیرکانودی ہاؤسنگ سوسائٹی تا درواٹی بفس۔ اسہ پین سوج اسے نا ورندی ٹی وزیر مملکت پارے کہ 46 ملک پاکستان نا شاری تے ویزہ فری انٹری تننگ ءُ ، ننا پاسپورٹ ناشرف اٹی ودکی مریک، درجہ بندی ٹی ساڑی حکومت نا دور اٹی گچینی بریک۔ اوپارے کہ اسلام آباد اٹی کسبی پنڈوک آتا برخلاف سخت کارروائی کننگانے، 2020ء ٹی 35، 2021 ٹی 370 و 2022ء ٹی 35 پنڈوک آتے سزا مسنے، دا چرجوئی ٹی سینیٹ نا قائمہ کمیٹی ہم بھاز اہم کڑد ادا کرینے ہرانا سوب آن داسہ پنڈوک آتا کچ اٹی نمان کمتی بسنے۔ سینیٹر فوزیہ ارشد نا ضمنی سوج انا ورندی ٹی اوپارے کہ احساس ریڑھی بان پروگرام نا رداٹ اسلام آباد نا چندی سیکٹر آتیٹی 27 لیسن جاری کننگانے۔
