وزیراعظم شہباز شریف تون پاکستان اٹی اقوام متحدہ نا ریزیڈنٹ کوآرڈینیٹر نا اوڑدہی، پاکستان تون کاریم و کمکاری نا چندی بشخ آتیا گپ وتران

اسلام آباد۔ 17 اگست (اے پی پی) وزیراعظم شہباز شریف تون پاکستان اٹی اقوام متحدہ نا ریزیڈنٹ کوآرڈینیٹر جولین ہارنیس چارشنبےنادے آ داڑے اوڑدہی کرے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی اقوام متحدہ  نا پائیدار شونداری کمکاری نا فریم ورک، نوکاپ آن نجات، خور انا رکھ و چاگڑدی نظام نا بحالی تون اوار اقوام متحدہ نا پاکستان تون کاریم و کمکاری نا چندی بشخ آتیا گپ وتران کننگا۔ وزیراعظم اقوام متحدہ نا چارٹر نا مسخت و اصول آتیکن پاکستان نا پکا عزم انا درشانی ءِ کرسا پارے کہ امن ، انسانی ہمدردی نا سرجز، موسمیاتی بدلی و پائیدار شونداری کن جہانی کمکاری نا بشخ آتیٹی پاکستان اقوام متحدہ نا کاریم تیٹی فعال کڑد ادا کننگ ءِ۔ وزیراعظم اقوام متحدہ نا ایجنڈا 2030 و پائیدار شونداری نا ہدف آتا دوئی کننگ کن پاکستان نا پیش رفت نا مخ تفی ٹی اقوام متحدہ نا کنڈآن ادا کروک آ اہم کڑد انا ستاءِ کرے۔ وزیراعظم مچ آ پاکستان اٹی ساڑی آ نوکاپ آن مروک آ بھسکاری آ گڑتی نا درشانی ءِ کرسا پارے کہ زہمی علاقہ غاتیٹی مخلوق ءِ انسانی بنداو تیا ریلیف نا فراوانی حکومت نا اولیت ءِ۔ اقوام متحدہ نا ریزیڈنٹ کوآرڈینیٹر وزیراعظم ءِ اقوام متحدہ نا پاکستان اٹی پائیدار شونداری، انسانی کمک، چاگڑدی رکھ ، خور انا رکھ و موسمیاتی بدلی نا بشخ آتا برجا سرجزآتیان معلومدار کرے۔ اوکورونا نا دین آن لچکدار بحالی و پائیدار شونداری کن پاکستان نا برجاکوشست آتیٹی اقوام متحدہ نا کنڈآن پدریسہ مخ تفی نا درشانی ءِ کرے۔ جولین ہارنیس جنوری 2020 آن پاکستان اٹی اقوام متحدہ نا ریزیڈنٹ کوآرڈینیٹر نا وڑاٹ تینا فرض ءِ سرتننگ ءِ، او اقوام متحدہ نا کنٹری ٹیم ہراٹی اقوام متحدہ نا غٹ ایجنسی، فنڈ، پروگرام اوار ءِ، نا کماشی ءِ کننگ ءِ و پاکستان نا شونداری اولیت و ڈٹ آتیان اقوام متحدہ نا ملک اٹی گام گیج آتا ہم گرنچی ءِ پک کننگ ءِ۔