ملکی زرگزران ءِ گچین کننگ کن کٹیا و خڑچ آتیٹی توازن، درآمد آتیا سیبو کم ، برآمد آتیٹی ودکی کروئی مریک، وزیر خزانہ مفتاح اسماعیل نا کانفرنس آن تران

اسلام آباد۔ 17 اگست (اے پی پی) وزیرخزانہ مفتاح اسماعیل پارینے کہ ملکی زرگزران ءِ گچین کننگ کن کٹیا و خڑچ آتیٹی توازن، درآمد آتیا سیبو ءِ کم کرسا برآمد آتیٹی ودکی کروئی مریک، بجٹ نسخان 5200 ارب روپئی آن کم کرسا 4000 ارب روپئی اسکان اتنگ نا کوشست کننگ اُن۔ داخیال آتا درشانی ءِ او چارشنبے نادے  آ اِرادے ئی لیڈرز سمٹ بزنس کانفرنس نا بنائی سیشن آن تران کرسا کرے۔ وزیر خزانہ پارے کہ ملکی زرگزران ءِ گچین کننگ کن کٹیا وخڑچ آتیٹی توازن ودی کروئی مریک۔ درآمد آتیا سیبو ءِ کم کرسابرآمد آتیٹی ودکی کروئی مریک۔ اوپارے کہ تدوک آ حکومت وام ہلسا پیدواری لائخی ءِ ودفنگ کن خڑچ کتو۔ پاکستان داوخت آ ہموڑے اف ہراڑے قائد اعظم و ننا باوہ پیرہ سجفیسر۔ ننے ٹی لائخی بھاز ارے ولے ہموخس شون ہلتون ہراخہ ہلوئی ئسک بھاز انگا ملک آک ننے آن مون آ ہنانو، نن تینا لیپ ءِ ہُرسا ہموخہ نت تے مریفن۔ اوپارے کہ تدوک آ سال 5200 ارب نا نسخان کرین، داسال 4000 ارب روپئی نا بجٹ نسخان گمانی ءِ۔ نجی بشخ اتون داخہ پیسہ اف کہ او حکومت نا کمک ءِ کننگ کے، ہنداخاطرآن وام ہلوئی تمک، وام ہلکونو ولے سہی کاریم اٹ اتنگتنو۔ اوپارے کہ 2013 آن 2018 اسکان 11500 میگاواٹ بجلی سسٹم اٹ اوار کننگا۔ نن بجلی نا پیدوار ءِ ڈبل کرین ولے صنعت نا پیدوار ڈبل متو، برآمد ہم ڈبل متو۔ اوپارے کہ خراج ءِ ودفوئی مریک یا خڑچ آتے کم کروئی مریک، نن 80 ارب ڈالر نا درآمد کننگ اُن، کاریم اٹ اتوک آ ہر گڑاتے درآمد کننگ اُن، ہراکہ گڑاءِ جوڑ کینہ ہندی مارکیٹ اٹی بہا کینہ، برآمد کپنہ۔ 80 درسد ملکی پیدوار ملک اٹی ہی کاریم اٹ اتینہ۔ درآمد آتیا سیبو ءِ کم و برآمد آتے ودفنگ وخت انا گرج ءِ۔ اوپارے کہ مکئی آن بیدس غٹ فصل آتا پیدوار اٹی بھارت، چین و دنیا غان پدی اُن۔ مفتاح اسماعیل پارے کہ تدوک آ سال چار ءُ نیم ارب ڈالر نا کنوئی آ تیل درآمد کرین، نن کینولا ناپیدوار ءِ ودفنگ آ چکار کننگ اُن، کشت وکشار نا پیدوار ءِ ودفنگ حکومت نا اولیت آتیٹی اوار ءِ، برآمدی صنعت آ چکار کروئی مریک۔ اوپارے کہ نن تعلیم اٹی بھاز پدی اُن۔ ننا نیمہ چنا اسکول آتیان پیشن ءُ۔ تعلیم نا پڑا ٹ صوبائی حکومت آک ہم بے سہب مسنو، نجی بشخ مون آ برے ، اگہ اسہ چین اس خوانفین تو بروک آ چین بھاز مون آ پیش تمک۔