بنجائی وزیر حوالکاری مریم اورنگزیب نا ریڈیو پاکستان نا کنڈآن دود اٹی گپ وتران

اسلام آباد۔ 17 اگست (اے پی پی) بنجائی وزیر حوالکاری و شینکاری مریم اورنگزیب پارینے کہ ریڈیو و پاکستان نا جم اوار اوار مس، ریڈیو ہنین آ پاکستان نا توار و پاکستانیت نا نشانی ءِ، ریڈیو راج اٹ اعتدال پسند رویہ غاتا مون آ دننگ اٹ اہم کڑد ادا کرے، ریڈیو نا کڑد اٹی کمتی آن راج اٹ انتہاپسند رویہ ودا۔ داہیت ءِ او ریڈیو پاکستان نا کنڈآن پاکستان نا جوڑ مننگ و ریڈیو پاکستان نا ڈائمنڈ جوبلی نا وخت آ اڈ ہلوک آ دود اٹی گپ وتران کرسا پارے۔ دود اٹی ریڈیو پاکستان نا سینئر فنکار، صداکار، نوشتکار، شاعرہ، موسیقار و ایلو بشخ آتیان تعلق تخوک آ بندغ آتے خاص وڑاٹ بٹنگ انگاسس۔ بنجائی وزیر حوالکاری پارے کہ ریڈیو پاکستان نا سینئر آرٹسٹ ننا میرات ءِ، نن اوفتا کسب ولائخی تیان بایدے فائدہ ہرفن۔ اوپارے کہ سینئر آرٹسٹ آتیان بیدس ننا ڈائمنڈ جوبلی نا دود  پورو مفک۔ داوخت آ بنجائی وزیر حوالکاری چندی کیٹیگری تیٹی گچین مروک آ چندی بندغ آتیٹی ایوارڈ ہم بشخا۔ بنجائی وزیر حوالکاری سینئر آرٹسٹ آتون اواری اٹ پاکستان نا سال دے نا کیک ءِ کاٹ کرے و اوفتے خراج تحسین پیش کرے۔ دود اٹی پاکستان نا جوڑ مننگ آن ہلیس داتم اسکان ریڈیو پاکستان آ چلینگوک آ قومی ترانہ ، ملی نغمہ نا جھلکی و خصوصی پرفارمنس ہم پیش کننگا۔ بنجائی وزیر حوالکاری داوخت آ ریڈیو پاکستان نا انتظامیہ و سینئر آرٹسٹ آتے پاکستان نا سال دے انا مبارکبادی تس۔ دود اٹی ڈائریکٹر جنرل ریڈیو سہیل علی خان ، پرنسپل انفارمیشن آفیسر مبشر حسن تون اوار وزارت حوالکاری و شینکاری نا ایلو بڑزکو کمامدارآک ہم ساڑی ئسر۔