شنگھائی جوزہ ءِ مون آ دننگ کن پورو وڑاٹ سنبرینگوک اُن، بنجائی وزیر واپار سید نوید قمر نا ایس سی او اکنامک فورم آن تران

اسلام آباد۔ 17 اگست (اے پی پی) بنجائی وزیر واپار سید نوید قمر پارینے کہ پاکستان داہیت آ پکا یخین تخک کہ ریاست آتا تعلقداری تین پہ تینی شرف، تہہ نا باندات آتیٹی نیام تمپننگ و اقوام متحدہ نا چارٹر ، جہانی کانود و ہڑتوم آکنڈآتا معاہدہ غاتا اصول آتے برقرار تخنسا ویل آتا پرامن ایسرآ بایدے مبنی مرے۔ داہیت ءِ او تاشقند اٹی شنگھائی کمکار تنظیم نا اِرادے ئی اکنامک فورم آن تران کرساپارے۔ سید نوید قمر پارے کہ شنگھائی کمکار تنظیم نا باسک آک جہانی زرگزران نا کم و ود 20 درسد و اونا آبادی نا 40 درسد ءُ۔ شنگھائی کمکار تنظیم اٹی بین علاقائی تعلقداری نا کمک اٹ باسک ملک آک نمان شون دوئی کرینو ولے داسکان دا لائخی تیان پبی فائدہ ہرفنگ تنے۔ علاقائی واپار، زرگزران، زرکاری، سائنس و ٹیکنالوجی، دودوربیدگی، انسانی ہمدردی و ایلو وارخواہی باسک ملک آتا نیام اٹ کمکاری ءِ نمان وڑاٹ سوگو کننگ کیک۔ سید نوید قمر پارے کہ دا سرجزآتا چندی بشخ آتیٹی کثیر جہتی اثر ءِ پک کیک، باسک ملک آتے خڑک اتیک و شنگھائی کمکار تنظیم نا باسک ملک آتا نیام اٹ تین پہ تینی مفاہمت ءِ کڑمب کیک۔ کنے داپاننگ تون خوشی مننگ ءِ کہ پاکستان، پورو باسک انا وڑاٹ الحاق آن پد آن، سیاسی، سیکورٹی ، اقتصادی ، دودوربیدگی و کانودی بشخ آتیٹی کمکاری ءِ مون آ دننگ کن فعال کڑد ادا کننگ نا است خواہی تخک۔ پاکستان شنگھائی کمکار تنظیم و ونا باسک آتون تاریخی و دودوربیدگی رابطہ و سوگو اقتصادی و تزویراتی شریداری ٹی اوار ءِ۔ ننا فائدہ و مسخت بھلو کچ اسے آ بشخ و ویل آتون گنڈوک ءِ۔ نن شنگھائی جوزہ ءِ مون آ دننگ کن مچ وڑاٹ سنبرینگوک اُن ہرا بریبری، پت، بقائے باہمی، دودوربیدگی تنوع ناشرف و اسیجائی شونداری نا است خواہی تیا زور شاغک۔ وزیر واپار پارے کہ پاکستان شنگھائی کمکار تنظیم ءِ بھاز اہمیت ایتک انتئے کہ دا ننے علاقائی امن، سوگوی و شونداری و علاقائی کمکاری نا مخ تفی ٹی تینا است خواہی ءِ تالان کننگ نا موکل ایتک۔