اسلام آباد۔ 16 اگست (اے پی پی) وزیراعظم شہباز شریف ٹانک اٹی پولیو ورکرز نا ٹیم آ دہشت گرد آتا سم کاری نا ترندی اٹ مذمت ءِ کرسا پارینے کہ قوم انا چناتا جان جوڑی نا دشمن تے چٹفسا دم کشنہ۔ وزیراعظم آفس نا میڈیا ونگ آن جاری بیان نا رداٹ وزیراعظم ٹانک اٹی پولیو ورکرآتا ٹیم آ دہشت گرد آتا سم کاری نا ترندی اٹ مذمت ءِ کرے و شہید پولیس کارندہ غاتے خراج عقیدت پیش کرے۔ وزیراعظم ٹانک انا علاقہ کوٹ اعظم کچہ آبادی ٹی سپاہی پیر رحمان و سپاہی نثار خان نا شہیدی آ ڈکھیائی و است ہسونی نا درشانی ءِ کرینے۔ وزیراعظم شہید پولیس کارندہ غاتا خاہوت تون ہمدردی نا درشانی ءِ کرسا پارے کہ دہشت گردی نا برخلاف پولیس عظیم قربانی تسنے، شہید آتے سلام پیش کینہ۔ وزیراعظم پارے کہ پولیوورکر آتیا جلہو کروک آک قوم انا چناتے معذور کننگ خوارہ۔ قوم انا چناتا جان جوڑی نا دشمن چے چٹفسا دم کشنہ۔ وزیراعظم شہید آتا درجہ غاتا بڑزی و خاہوت کن صبر و جمیل نا دعا کرے۔
