اسلام آباد۔ 15 اگست (اے پی پی) وزیراعظم محمد شہباز شریف پیشن نا زرکار کمپنی خاص وڑاٹ گوادر فری زون اٹی زرکاری کروک آ کمپنی تا ویل آتے ایسر کننگ کن کمیٹی اس جوڑ کرینے و پارت کرینے کہ ملک اٹی درملکی زرکاری نا کسر اٹ بروک آ غٹ اڑاند آتے دمدستی وڑاٹ مرکننگے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی ملک اٹی زرکاری آ بڑزکو کہولی دیوان اسے ٹی تران کرسا کرے۔ دیوان اٹی بنجائی وزیر مفتاح اسماعیل، چوہدری سالک حسین، احسن اقبال، خصوصی کمکار طارق فاطمی، ظفرالدین محمود و تعلقدار بڑزکو کمامدار آک بشخ ہلکر۔ دیوان اٹی وزیراعظم کمیٹی ءِ دہ دے انا تہہ ٹی سرجم رپورٹ و سلاہ و سوج شین ترسا پیش کننگ نا پارت کرے۔ وزیراعظم پارے کہ چینی زرکارکمپنی تے اولیتی بنداو تیا آسراتی فراوان کننگے۔ چینی ورکرآتا ویزا نا دوئی کننگ اٹ غٹ اڑاند آتے دمدستی ایسر کننگے۔ چینی ورکرآتا ویزاٹی سی پیک و ایلو کمپنی تا ورکرآتاپرخ ءِ چٹفسا ویزا نا وڑوڈول ءِ آسان و ترند کننگے۔ دیوان اٹی وزیراعظم ءِ توانائی، انفراسٹرکچر، ریلوائی، پورٹ انفراسٹرکچر و ایلو ڈٹ آتیٹی 10 ارب ڈالر نا زرکاری ٹی است خواہی تخوک آ کمپنی تا بارواٹ سرجم وڑاٹ معلومدار کننگا۔ دیوان ءِ پاننگاکہ اولیکو ریسہ ٹی دمدستی وڑاٹ 1 آن 2 ارب ڈالر نا زرکاری گمانی ءِ۔ داکان بیدس دا ڈٹ آتیان نئے بیرہ 45 ہزار آن زیات روزگار ناوارخواہی ودی مریک بلکن پاکستان نا Ease of Doing Business Index اٹی گچینی بریک۔ وزیراعظم دمدستی وڑاٹ دا ڈٹ آتیا زرکاری بورڈ، وزارت ڈٹ بندی و وزارت خزانہ ءِ تین پہ تینی کمکاری اٹ اسہ جوان ءُ پلان اس جوڑ کننگ نا پارت جاری کرے۔
