اسلام آباد۔ 15 اگست (اے پی پی) پاکستان و سعودی عرب زرکاری، توانائی و واپار نا بشخ آتیٹی تین پہ تینی کمکاری ءِ پین ودفنگ آ امنا کرینو۔ دوشنبے نادے آ وزیراعظم شہباز شریف سعودی عرب نا نائب وزیراعظم و وزیر دفاع ،ولی عہد شہزادہ محمد بن سلمان آل سعود تون ٹیل فون آ گپ وتران کرے۔ وزیراعظم خادم الحرمین  شریفین شاہ سلمان بن عبدالعزیز کن نیک است خواہی نا درشانی ءِ کرے۔ سعودی عرب نا ولی عہد محمد بن سلمان وزیراعظم و پاکستانی قوم ءِ 75 می یوم آزادی آ مبارکبادی تس۔ ولی عہد شہزادہ محمد بن سلمان پاکستان نا شونداری و شونہالی کن نیک است خواہی نا درشانی ءِ کرے۔ ہڑتوم آ راہشونک تین پہ تینی است خواہی نا امور آ گپ وتران کریر و پاکستان سعودی عرب نا نیام اٹ سال آتیا تالان سوگو برادرانہ تعلقداری ءِ پین سوگو کننگ نا عزم انا درشانی ءِ کریر۔ وزیراعظم شہباز شریف و ولی عہد شہزاد ہ محمد بن سلمان وزیراعظم نا اپریل 2022 نا دورہ ٹی ہلوک آ فیصلہ غاتیا پیش رفت نا جاچ ءِ ہلکر۔ ہڑتوم آ راہشونک پاکستان و سعودی عرب نا نیام اٹ زرکاری، توانائی و واپار نا بشخ آتیٹی تین پہ تینی کمکاری ءِ پین ترند کننگ آ امنا کریر۔ وزیراعظم برادر ملک سعودی عرب نا پاکستان نا مشکل وخت اٹی کمک نا ذکر ءِ کرسا ولی عہد شہزادہ محمد بن سلمان نا پاکستان نا زرگزران نا سوگوی و شونداری کن ساڑی آ کمکاری آ منت واری ءِ ہرفے۔ وزیراعظم ولی عہد شہزادہ محمد بن سلمان ءِ پاکستان نا زوت دورہ نا سلہ خلک ہرادے او امنا کرے۔

متعلقہ مضامینمصنف کی طرف سے مزید