اسلام آباد۔ 15 اگست (اے پی پی) پاکستان مسلم لیگ (ن) نا سینئر راہشون طلال چوہدری پارینے کہ عمران خان مہالو اسٹیبلشمنٹ نا لخ اٹ تموک ئس داسہ نت تیا تمنگ ءِ، اگہ عمران خان نا دامن ساف ءِ تو او عدالت آتیان حکم امتناعی دوئی کننگ کن انت اکن دُدینگ انگ ءِ، تینا کیس آتے چٹفنگ کن داسہ او منت کننگ اٹ لگوک ءِ، ملک ءِ حقی آجوئی ترفنگ نا ہیت ءِ کروک آ جماعت خیبرپختونخوا و پنجاب ہراڑے اونا صوبائی حکومت آک ءُ ہموڑے یوم آزادی نا بابت ہچ ءُ دود اس اڈتننگتو، عمران خان مچ آ زند ایلو فتے کاریم اٹ اتسا بسنے، پرویز الٰہی عمران خان تون ہندن کیک ہراوڑ او پرویز مشرف تون کرے۔ دوشنبے نادے آ نیشنل پریس کلب اٹی پریس کانفرنس کرسا طلال چوہدری پارے کہ ملک ءِ حقی آجوئی ترفنگ نا ہیت کروک آ جماعت، ہرانا پنجاب ، خیبرپختونخوا و گلگت بلتستان اٹی صوبائی حکومت آک ءُ، ہموڑے یوم آزادی نا بابت ہچ ءُ دود اس اڈتننگتو۔ اوپارے کہ عمران خان ءِ پرویز الٰہی ہموڑے سرکیک ہراڑے اوپرویز مشرف ءِ سرکرے۔ عمران خان نا جہد دادے کہ اسٹیبلشمنٹ نا کڑد ملکی سیاست اٹ مرے، عمران خان مہالو اسٹیبلشمنٹ نا لخ اٹ تموک ئس داسہ نت تیا تمنگ ءِ، عمران خان ساڑی آ جلسہ ٹی بھلا پڑو تا جاگہ غا تینا سفائی ٹی ویڈیو نشان ترسا کرے۔ عمران خان صاحب نی پاریسہ ہرانا دامن ساف مرے او دمدستی ورندی ایتک، ایف آئی اے ہرانوٹس ءِ تس اوڑآ حکم امتناعی انت اکن ہلنگ اُس، شہید آتا برخلاف ٹرینڈ چلیفنگا، عمران خان شہباز گل ءِ قربانی نا ایٹ اس جوڑ کرسا تینا جان ءِ کشنگ خواہک، اوپارے کہ تنقید و غداری ٹی بھاز پرخ ءِ، شہباز گل نا باندات ءِ ایسراسکان سرکننگک۔ اوپارے کہ مسلم لیگ نا راہشون تیان بیدس نوٹس دزگیری مس ریمانڈ تننگا، شہباز گل داوخت آ اڈیالہ زندان اٹی ءِ ہراپنجاب حکومت نا ماتحت ءِ اگہ اوڑآ بیدادی مس تو داتم اسکان اونا میڈیکل ءِ انت اکن کرفنگتنے، طلال چوہدری پارے کہ شہباز گل ءِ زندان اٹی اے کلاس تننگانے، پورو آسراتی اٹ کن وخور سرکننگ انگ ءِ، شہباز گل آن جاست وپاست اٹی ہراہیت مون آ بسنے اوفتا مون آ بننگ آ مخلوق نا خنک ملنگرہ۔
