اسلام آباد۔ 15 اگست (اے پی پی) بنجائی وزیر چاگڑدی بدلی سینیٹر شیری رحمان پارینے کہ دنیا ٹی بھلا ڈیم تا کچ کم وخت اس کہ چنکا ڈیم تا کچ ودنگ ءِ، نن تینا وسیلہ غاتے مون آ تخسا بایدے چنکو ڈیم جوڑ کین۔ داخیال آتا درشانی ءِ او دوشنبے نادے آ بنجائی وزارت آبی وسیلہ نا کنڈآن موسمیاتی بدلی نا کشت وکشار آ اثرآتا سرحال آ کانفرنس آن تران کرسا کرے۔ شیری رحمان پارے کہ ننا سسٹم اٹی دیر کم مسنے، وزارت چاگڑد دا بابت پگہ کابینہ ءِ حوال تننگ والا ءِ۔ اونا پاننگ ئس کہ دنیا ٹی بھلاڈیم تا کچ کم و چنکا ڈیم تا تفنگ نا کچ ودنگ ءِ۔ اوپارے کہ بھلا ڈیم تا تفنگ کن بھلو کچ اسے ٹی فنڈ درکار مریک، بھارت اٹ بھلا ڈیم تا برخلاف مخلوق برانز کیک، نن ہم تینا وسیلہ غاتے مون آ تخسا بایدے چنکو ڈیم جوڑ کین۔ ننے تینا ڈٹ آتا اولیت آتے بدل کروئی مریک۔شیری رحمان پارے کہ ننا ڈیم تا ڈٹ 10 سال آن 15 سال اسکان پورو مفک، نن تون بھلو ڈیم جوڑ کننگ کن نئے وسیلہ ارے و نئے وس۔ اونا پاننگ ئس کہ پاکستان 2025 اسکان خشک سالی نا گواچی مریک، ننے دا بابت وخت آ گام گیج کننگ نا گرج ءِ۔
