اسلام آباد۔ 15 اگست (اے پی پی) خاتون اول بیگم ثمینہ عارف علوی ورناتیا زور شاغانے کہ او تعلیم و تینا گچین لائخی تے کاریم اٹ اتسا ملک ءِ شون ہلوک جوڑ کننگ کن تینا کڑد ءِ ادا کیر، زالبول و خصوصی بندغ آتے واکدار کننگ و اوفتے روزگار نا فراوانی حکومت و راج انا زمواری ءِ ، سینہ نا کینسر آن زالبول آتا مرک آتے کم کننگ کن پبی آگاہی مہم و گچین گام گیج نا گرج ءِ۔ داخیال آتا درشانی ءِ او دوشنبے نادے آداڑے اقراء یونیورسٹی ٹی یوم آزادی نا ڈائمنڈ جوبلی نا بابت ’’اینو نا ورناپگہ نا پاکستان ‘‘ نا سرحال آن اڈ ہلوک آ دود آن تران کرسا کرے۔ دود اٹی طالب علم و فیکلٹی باسک آتون اوار ایلو اہم شخصیت آک بشخ ہلکر۔ بیگم ثمینہ عارف علوی طالب علم آتے پارے کہ او تینا گچین لائخی تے کاریم اٹ اتسا پاکستان ءِ اسہ شون ہلوک ملک اس جوڑ کننگ کن تینا کڑد ءِ ادا کیر۔ اوپارے کہ پدسلوک علاقہ غاتیان تعلق تخوک آ ورناک، زالبول آک و خصوصی بندغ آتے واکدار کننگ حکومت و راج انا زمواری ءِ۔ خاتون اول سرکاری و غیرسرکاری ادارہ غاتیا زور شاغا کہ او خصوصی بندغ آتے گوجالپس بلکن اوفتے کن آسراتی ودی کیر تانکہ او راج انا کاریمی شاری جوڑ مننگ کیر۔ اوپارے کہ خصوصی بندغ آتے نیوٹک نا کمک اٹ چندی کسب ہیل تننگ انگ ءِ تانکہ او تینا نت تیا سلنگ کیر۔ اوحکومتی ادارہ غاتیا زور شاغا کہ او روزگار اٹی زالبول و خصوصی بندغ آتا کوٹہ ءِ ودفر تانکہ اوفتا احساس محرومی چٹنگ کے۔ بیگم ثمینہ عارف علوی پارے کہ راج خصوصی بندغ آتا مشکل و محرومی تے کم کننگ اٹ اہم ءُ کڑد اس ادا کننگ کیک، زالبول آتے واکدار کننگ اوفتے کن کاریم و روزگار نا چاگڑد ءِ سازگار کننگ نا گرج ءِ۔ اوپارے کہ پاکستان نا ورناک باصلاحیت و سنبرینگوک ءُ و اوہروڑنا چیلنج آتون مون تننگ کن تیار ءُ، ورناتے ملک انا شونداری و شونہالی کن تینا کڑد ءِ ادا کروئی مریک۔
