کیسکو ہیڈ کوارٹر اٹی یوم آزادی نا دود، بیرک ءِ چست کننگا

کوئٹہ۔ 14 اگست (اے پی پی) کوئٹہ الیکٹرک سپلائی کمپنی (کیسکو) نا ملازم آک 75 می یوم آزادی  ءِ جم وجوش اٹ کیسکو ہیڈ کوارٹر اٹ اڈ تسر۔ داوخت آ اسلام آباد اٹی مروک آ مرکزی دود اتون کیسکو ہیڈکوارٹر اٹی ہم بیرک ءِ چست کننگا و قومی ترانہ ءِ خواننگا۔ چیف ایگزیکٹو آفیسر کیسکو انجینئر عبدالکریم جمالی بیرک ءِ چست کرے۔ دود اٹی چیف انجینئر (اواینڈ ایم ) شفقت علی، چیف انجینئر(ٹی اینڈ جی) سمیع اللہ ، چیف انجینئر(آپریشن ڈائریکٹر ) شوکت جوگیزئی ، ڈائریکٹر جنرل (ایچ آر اینڈ ایڈمن) سید عزیر علی حسنی ، چیف انجینئر (ڈویلپمنٹ) ولی اچکزئی، چیف انجینئر (پلاننگ )نعیم کاکڑ، کیسکو نا سینئر آفیسرآک، آل پاکستان واپڈا ہائیڈرو الیکٹرک ورکرز یونین (سی بی اے) نا مرکزی جوائنٹ صدر و صوبائی چیئرمین حاجی محمد رمضان اچکزئی و یونین نا زونل ، ڈویژنل و سب ڈویژنل عہدیدار آک و کارندہ غاتا بھلو کچ اس بشخ ہلکر۔ داوخت آ چیف ایگزیکٹو آفیسر انجینئر عبدالکریم جمالی تران کرسا پارے کہ بحیثیت اسہ قوم نن بے پناہ قربانی تیان پد اسہ عظیم ءُ ملک اس دوئی کننگ اٹ سرسہب مسن۔ اوپارے کہ ننے غٹ ءِ تینا تینا بشخ آتیٹی بانی پاکستان نا روشنا اصو ل آکاریم، کاریم و بیرہ کاریم آ سختی اٹ عمل کرسا ملک ءِ سوگو و شونہال جوڑ کننگ نا عظیم مسخت آتے دوئی کرسا شونداری نا کنڈآ دننگ نا گرج ءِ۔ انجینئر عبدالکریم جمالی پارے کہ نن غٹ دا قول کین کہ داملک، صوبہ و کمپنی نا گچینی، شونداری و شونہالی کن ایلمی و سیوت اٹ تینا گچین کڑد ءِ ایمانداری و فرض شناسی اٹ ادا کینہ۔ داوخت آ سی ای او مچ آ قوم و کیسکو آفیسر و ملازم آتے جشن آزادی نا مبارکبادی ترسا آجوئی نا متوالہ و شہید آتے خراج تحسین پیش کرے و ملکی سوگوی و شونداری و شونہالی کن خصوصی دعا کرے۔