75 می یوم آزادی، ڈی سی آفس سوراب اٹی بیرک ءِ چست کننگ نا دود اس اڈ تننگا

کوئٹہ۔ 14 اگست (اے پی پی) بلوچستان نا علاقہ سوراب اٹی 75 می یوم آزادی ءِ جم و جوش اٹ اڈتننگا، دے انا بناغا ڈی سی کمپلیکس اٹی بیرک ءِ چست کننگ نا پروقار دود اس اڈ ہلک، ڈپٹی کمشنر سوراب جلال الدین خان کاکڑ بیرک ءِ چست کرے۔ سرجم حوال آتا رداٹ بیرک ءِ چست کننگ نا دود اٹی ایس پی سوراب عبدالعزیز جھکرانی ، کرنل اسجد، اسسٹنٹ کمشنر سوراب محمد اسماعیل مینگل، اسسٹنٹ کمشنر گدر مہر آباد ، عبدالوہاب ، ڈسٹرکٹ ایجوکیشن آفیسر سوراب امجد شہزاد بلوچ، چیف آفیسر میونسپل کمیٹی سوراب منظور احمد موسیانی ، ایکسیئن سی اینڈ ڈبلیو چاکر بلوچ، ڈسٹرکٹ ہیلتھ آفیسر ڈاکٹر محمد اسلم ملازئی، ڈپٹی ڈائریکٹر لائیو اسٹاک ڈاکٹر محمد ایوب نورزئی تون اوار انتظامی آفیسر آک، قبائلی و سیاسی سرکڑدہ غاک بشخ ہلکر۔ داوخت آ لیویز و پولیس نا چا ک و چوبند دستہ قومی بیرک ءِ سلامی تس و قومی ترانہ ءِ ہم خواننگا۔ دود آن تران کرسا ڈپٹی کمشنر جلال الدین خان کاکڑ ایس پی عبدالعزیز جھکرانی کرنل اسجد و ایلوترانکارآک پاریر کہ اینو مچ آقوم 75 می یوم آزادی گولڈن جوبلی نا وڑاٹ جم و جوش و ملی جوزہ اٹ اڈتننگ ءِ، لکھ آ قربانی تا سوب آن ننے دا ملک رسینگا ہرا للہ تعالیں نا اسہ بھاز بھلو نعمت اسے، داسہ دانا شونداری سوگوی ورکھ ننا غٹ انا زمواری ءِ ہراڑکن نن ہروڑنا قربانی ایتنہ۔ اونا پاننگ ئسک کہ ہزار آ شاریک و فورس آتا دتر نا سوب آن وطن عزیز سوگو آ دوتیٹی رکھ ءِ ننے دادے انا وخت آ قول ءِ پوسکن کروئی مریک کہ دانا شونداری و شونہالی و سوگوی کن تینا توانائی تے خڑچ کینہ۔