چوری آ چناتا کاٹم آمہر اٹ  دوتخنگ اہم ءُ زمواری و خذمت اسے، سویٹ ہوم تا چناتا گچینی و شونداری کن حکومت پین گام گیج کیک، شہباز شریف

اسلام آباد۔ 14 اگست (اے پی پی) وزیراعظم شہباز شریف پارینے کہ چوری آ چناتا مہر اٹ کاٹم آ دوتخنگ اہم ءُ زمواری و خذمت اسے ، حکومت سویٹ ہوم تا چناتا گچینی و شونداری کن پین گام گیج کیک، چوری آ چناتا کفالت و تعلیم و تربیت نا فرض ءِ ہرفسا زمردخان و اونا سنگت آک اسہ عظیم ءُ کاریم اس کننگ ءُ۔ وزیراعظم سویٹ ہوم تا چناتیکن بس آتا ٹیکی اس تننگ نا پڑو ہم کرے۔ یک شنبے نادے آ وزیراعظم یوم آزادی نا ڈائمنڈ جوبلی نا وخت آ پاکستان سویٹ ہومز نا دورہ ءِ کرے و جشن آزادی نا بابت دود اٹی بشخ ہلک۔ سویٹ ہومز انا چناتا کنڈآن وزیراعظم نا بننگ آ اودے جم وجوش اٹ بخیر کننگا۔ سویٹ ہومز نا خاکی وردی بینوک چناک مارچ پاسٹ کریر و وزیراعظم ءِ سلامی تسر۔ داوخت آ وزیراعظم تون اوار وزیر حوالکاری و شینکاری سرپرست اعلیٰ پاکستان سویٹ ہومز زمرد خان، بنجائی وزیر مرتضیٰ جاوید عباسی، حنیف عباسی، انجم عقیل، چوہدری یاسین ئسک ہم ساڑی ئسر۔ داوخت آ تران کرسا وزیراعظم شہباز شریف پارے کہ اینو مچ آ قوم یوم آزادی ءِ اڈتننگ ءِ و دا یوم آزادی نا 75 می سال دے ءِ ہرا پاکستان تون اوار مچ آ دنیا ٹی پاکستانیک دادے ءِ اڈتننگ ءُ، پاکستان سویٹ ہومز اٹی قوم انا ہنین آ چناتتون ملسا بے حد خوشی مننگ ءِ، دا صدقہ جاریہ ءِ ، زمر د خان و اونا سنگت آک دا عظیم زمواری ءِ سنبھالانو، ہمو چناک ہرا لمہ و باوہ نا سیخا غان محروم ءُ  اوفتا مہر اٹ کاٹم آ دوتخوک آک دین و دنیا ہڑتوم آتا کٹنگ ءُ، دانا اللہ اوفتے اجر ایتک، دا اسہ قومی خذمت نا فرض اس سرتننگ ءُ۔ سد آ بے سیبو چناتے تعلیم نا زیور آن آراستہ کننگ ءُ اوفتے کن مفت تعلیم، رہینگ و کن و خور نا بست وبند کننگانے۔ اوفتے پوسکن آ علم آن آراستہ کننگ ءُ داڑآن بھلا ہچ ءُ قومی خذمت اس مننگ کپک، اوپارے کہ دا چناک ہرافتیان اوفتا بارواٹ داسہ اَریفیٹ ، اوفتالمہ و باوہ کزیت کرینو و اوفتا خاہوت کن بھلو زرگزرانی مشکلات ءِ، زمردخان ءِ اوتینا پاپاجانی پارہ، داحقی وڑاٹی اسہ باوہ و استاد اسے نا رول ءِ ادا کننگ ءِ و اوفتا کاٹم آ مہر اٹ دوتخنگ ءِ ، داکان بھلو ہچ ءُ انسانی خذمت اس مننگ کپک۔ اوزمردخان ءِ مبارکبادی ترساپارے کہ قرآن کریم اٹی چوری آ چناتتون شفقت اٹ پیش بننگ نا پرمان ءِ و اوفتا مال اٹ زرس ہم اوار سوار مفننگ نا پرمان ءِ، چنکی ٹی اوفتا مال انا رکھ و بھلن مننگ آ اوفتا دا امانت ءِ اوفتا دوٹی تننگ نا پرمان ءِ۔ اوپارے کہ قرآن کریم اٹی جاگہ جاگہ غا چوری تا بارواٹ صلہ رحمی نا پرمان بسنے۔ سویٹ ہومز اٹی دانا عملی عکس ءِ خنان۔ اوپارے کہ دا چوری آ چناتتون دا جشن آزادی ءِ اڈتننگ ءُ ہرا مچ آ ملک آن اسہ گلدستہ سے نا دروشم اٹ ساڑے ساڑی ءُ۔ اوپارے کہ چناک جشن آزادی نا بابت جذباتی و شاندار تقریر کرینو، اوڑآ اوفتا استاد آتے ہم خراج تحسین و سلام پیش کینہ۔ زمرد خان نا کنڈآن چناتیکن ٹرانسپورٹ نا ویل ءِ ہرفنگ آ وزیراعظم سویٹ ہومز انا چناتیکن بس آتا ٹیکی اس تننگ نا پڑو کرے۔ اوپارے کہ دا عظیم درسگاہ ءِ ودفنگ کن ہراخذمت درکار مس اوفتے کینہ۔ وزیراعظم داوخت آ پاکستان و قائد اعظم زندہ باد نا نعرہ ہم خلفے۔ ہرانا چناک پبی ورندی ءِ تسر۔ اوداوخت آ چناتتون اوار جشن آزادی نا کیک اس کاٹ کرے و داچناتے کیک ہم کنفے۔ وزیراعظم چناتتون ملا و اوفتے تون گپ وتران ہم کرے۔