14 اگست ہمو تاریخی دے ءِ ہراتم 75 سال مست پاکستان اسہ آجو و وتواجہ ریاست اسے نا حیثیت اٹ جوڑ مسوسس، میر جان محمد جمالی

کوئٹہ۔ 14 اگست (اے پی پی) قائم مقام گورنر بلوچستان میر جان محمد جمالی مچ آ قوم ءِ جشن آزادی پاکستان نا 75 می سال دے انا مبارکبادی ترسا پارینے کہ 14 اگست ہمو تاریخی دے ءِ ہراتم 75 سال مست پاکستان اسہ آجو و وتواجہ ریاست اسے نا حیثیت اٹ جوڑ مسوسس، دا مسلم ملک آتیٹی اسٹ انگا نیو کلیئر پاور ءِ ہرانا سوب آن دانا دفاع ناقابل تسخیر جوڑ مسنے ، داخیال آتا درشانی ءِ او گورنر ہاؤس کوئٹہ ٹی جشن آزادی نا 75 می سال دے انا رداٹ اسہ پروقار دود اسے نا بشخ ہلوک آتیان تران کرسا کرے۔ داوخت آ چیف سیکرٹری بلوچستان عبدالعزیز عقیلی ، انسپکٹر جنرل بلوچستان عبدالخالق شیخ، یونیوسٹی آف بلوچستان نا وائس چانسلر پروفیسر ڈاکٹر شفیق الرحمان، وویمن یونیورسٹی نا وائس چانسلر ڈاکٹر ساجدہ نورین، ڈاکٹر عطاء الرحمان، بڑزکو سرکاری آفسیرآک، استاد آک، و زند انا چندی بشخ آتیان تعلق تخو ک آ بندغ آتون اوار یونیورسٹی نا طالب علم آتا اسہ بھلو کچ اس ساڑی ئسر۔ قائم مقام گورنر بلوچستان پارے کہ ننے آجوئی بزرگ آتا مریس جہد و بے شمار قربانی تیان پد رسینگانے داسہ دا ورناچین نا زمواری ءِ کہ او تینا قومی آجوئی ءِ برجاتخر، قائم مقام گورنر بلوچستان پارے کہ اینو نن دا دے آ تینا محاسبہ ءِ کین کہ نن انتس گوہان انتس دوئی کرین۔ اوپارے کہ بلوچستان اٹی آباد قومک شاندار قدر و روایت آتا امین ءُ ہرافتا مثبت و تعمیری ننا سیاسی زند آہم پیدوار ءِ۔ دود اٹی کمانڈر 12 کور لیفٹیننٹ جنرل سرفراز علی، اونا سنگت آتون اوار ساڑی آ نوکاپ آتیٹی شہید مروک آ بندغ آتیکن خصوصی دعاہم کریر۔ جشن آزادی پاکستان نا 75 می سال دے انا رداٹ دود انا بشخ ہلوک آتیان یونیورسٹی آف بلوچستان نا وائس چانسلر پروفیسر ڈاکٹر شفیق الرحمان، وویمن یونیورسٹی نا وائس چانسلر ڈاکٹر ساجدہ نورین و ڈاکٹر عطاء الرحمان ئسک ہم تران کریر۔ داکان مست قائم مقام گورنر بلوچستان میر جان محمد جمالی یوم آزادی پاکستان نا وخت آ بیرک ءِ چست کرے۔