این ڈی ایم اے نا کنڈآن نوکاپ زہمی تیکن ہلہلہ ئی امداد نا فراوانی برجا، ترجمان این ڈی ایم اے

اسلام آباد۔ 14 اگست (اے پی پی) نیشنل ڈیزاسٹرمینجمنٹ اتھارٹی (این ڈی ایم اے) نا ترجمان پارے کہ نوکاپ آن زہمی تیکن ہلہلہ ئی امداد نا فراوانی برجاءِ۔ یک شنبے نادے آ جاری بیان اٹی ترجمان این ڈی ایم اے پارے کہ غٹ آن زیات کمکی گڑا بلوچستان نا زہمی علاقہ غاتیٹی سرکننگانے۔ داتم اسکان 39ہزار بندغ آتیکن راشن بیگ تننگانے وخت اس کہ 45 ہزار آن زیات زہمی تیکن تمبو ہم بلوچستان سرکننگانے۔ ہندا وڑ 6 ہزار ترپال، مچھر دانی، 3 ہزار آن زیات کمبل ہم نوکاپ آن زہمی بندغ آتیکن تننگانے۔ داکان بیدس 55 ڈی واٹرنگ پمپ و 50 جنریٹر ہم گدریفنگانے۔ اوپارے کہ نوکاپ نا زہمی تیکن ایلو کمکی گڑاتیٹی کچن سیٹ، جان جوڑی نا کٹ و کیمیکل اسپرے مشین ہم اوار ءِ وخت اس کہ بلوچستان کن 14 اگست آ پین کمکی گڑا روانہ کننگ انگ ءِ۔ تازہ کھیپ اٹی 60 ہزار بندغ آتیکن ترپال، کمبل و مچھردانی روانہ کننگ انگ ءِ وخت اس کہ 200 اسکول تمبو ہم کمکی گڑاتیٹی اوار ءِ۔ اینو روانہ کروک آ کمکی گڑاتیٹی 35 جنریٹر و 30 ڈی واٹرنگ پمپ ہم اوار ءُ وخت اس کہ ریلیف گڑاتیٹی 5 ہزار راشن بیگ و زہمی تیکن 3 ہزار واٹر جیری کین ہم روانہ کروک آ کمکی گڑاتا بشخ ءُ۔ اوپارے کہ سعودی ریلیف نا کنڈآن بلوچستان زہمی تیکن تروک آ اسہ ہزار راشن بیگ آتے ہم روانہ کننگ انگ ءِ۔