آئی ایم ایف تون معاہدہ طے مننگ آن پد سیوتی حکومت نا ہر فیصلہ الس نا زند اٹی آسانی اتنگ نا کسر ءِ آوار کیک، بنجائی وزیر خزانہ مفتاح اسماعیل

اسلام آباد۔ 14 جولائی (اے پی پی) بنجائی وزیر خزانہ مفتاح اسماعیل پارینے کہ وزیراعظم شہباز شریف نا کماشی ٹی دے و نن خواری کرسا آئی ایم ایف تون اسہ جوان ءُ معاہدہ اس طے کننگ اٹ سرسہب مسن، آئی ایم ایف ننا’’اڑزآن پیٹرول اڑزآن ڈیزل‘‘ اسکیم ءِ و بے نظیر انکم سپورٹ پروگرام و سیوتی حکومت نا نیزگار دوست پالیسی تا ستاءِ کرے۔ پنچ شنبے نادے آ آئی ایم ایف نا کنڈآن پروگرام بحالی نا بابت جاری بیان اٹی اوپارے کہ الس کن خوش خبری و مبارک مرے، اللہ تعالیٰ نا شکر ءِ ادا کینہ کہ آئی ایم ایف تون پاکستان نا معاہدہ طے مسنے، قوم ءِ مبارکبادی ایتیوہ، وزیراعظم شہباز شریف نا کماشی ٹی دے و نن خواری کرسا آئی ایم ایف تون اسہ گچین ءُ معاہدہ اس طے کننگ اٹ سرسہب مسن۔ اوپارے کہ آئی ایم ایف امنا کرینے کہ تدوک آ سال انا تاخیری گام گیج آتا سوب آن بھاز زیات بجٹ نسخان مس، آئی ایم ایف منانے کہ تدوک آ سال بجلی نا بشخ اٹی بے ڈولی و تاخیری گام گیج آتا سوب آن گردشی وام اٹی 800 ارب روپئی نا ودکی مس۔ اوپارے کہ پک مس کہ ٹیم اہل مرے، اونا نیت ساف و ارادہ غاک پکا مریر تو کارکڑد و الس نا خذمت اٹی گچینی بننگ کیک ، نن زیات خراج جمع کینہ، و زیات خواری کینیہ و الس ءِ پین آسانی تننگ کن کوشست کینہ، شدید زرگزرانی مشکل آتیان پد ہم نن الس دوست بجٹ اس تسن، الس ءِ ریلیف تسن، نن ہزگار تپہ غاتیا بھاریم شاغانن۔ اوپارے کہ آئی ایم ایف ننا ’’اڑزآن پیٹرول اڑزآن ڈیزل‘‘ اسکیم  ءِ و بے نظیر انکم سپورٹ پروگرام و سیوتی جماعت نا نیزگار دوست پالیسی تا ستاءِ کرینے۔ وزیراعظم شہباز شریف نا کماشی ٹی سیوتی حکومت ملک و قوم انا فائدہ ٹی پیٹرول وڈیزل نا نہاد آتیٹی ودکی نا مشکل فیصلہ کرینے، وزیراعظم شہباز شریف و سیوتی حکومت اٹی اوار غٹ جماعت آتا سرکڑدہ و راہشون تے ہم مبارکبادی ایتیوہ و اوفتا جوزہ و خلوص نا ستاءِ کیوہ۔ اوپارے کہ اللہ تعالیٰ نا مہربانی اٹ جہانی منڈی ٹی تیل انا نہاد کم مننگ ءِ۔ مشکل حالیت آتیٹی مشکل ءُ فیصلہ کروئی تما، آئی ایم ایف تون معاہدہ طے مننگ آن پد سیوتی حکومت نا ہر فیصلہ الس نا زند اٹی آسانی اتنگ نا کسر ءِ آوار کیک ۔