اسلام آباد۔ 14 جولائی (اے پی پی) قطبی وزیرستان آن پولیو نا دُوانزدہ می کیس پک مسنے ، چنا نا وئی 21 تُو ءِ۔ میر علی یونین کونسل 2 آن تعلق تخوک آ دا چنانا معذوری 18 جون آ رپورٹ مس۔ پاکستان نیشنل پولیو لیبارٹری پولیو کیس پک کرینے۔ خیبرپختونخوا نا سویلی ضلع بشمول سویلی و قطبی وزیرستان ، ڈی آئی خان ، بنوں، ٹانک و لکی مروت پولیو دین اکن حساس گوندنگانو، اینخو بنوں آن ہم اپریل و مئی ٹی چاگڑدی وڑتیٹی دین پک مس ہراڑآن پک مریک کہ پولیو دین انا تالانی قطبی وزیرستان اسکان محدود اف۔ بنجائی وزیر جان جوڑی عبدالقادر پٹیل پارے کہ قطبی وزیرستان آن اولیکو کیس رپورٹ مننگ آن پد پولیو پروگرام چندی وار مہم اڈ تسنے تانکہ دین انا ممکنہ تالانی ءِ توننگ مرے۔ بنجائی سیکرٹری جان جوڑی ڈاکٹر فخر عالم عرفان پارینے کہ دُن تو پولیو کیس اسہ ہی علاقہ غان رپورٹ مننگ ءِ، ولے المی ءِ کہ لمہ و باوہ تینا چناتے ہرمہم اٹ پولیو آن بچفنگ نا پڑی ضرور کنفر، بنائی جاست وپاست نا رداٹ چنانا چپیکو نت معذور مسنے۔ پنچ سال آن کم وئی چناتے پولیو پڑی کنفسا دا موذی دین ءِ تالانی آن بچفنگ مریک۔ وار وار پولیو پڑی کنفنگ آن دنیا نا غٹ ملک آک پولیو آن پاک مسنو۔ انسداد پولیو مہم اٹی زیات آن زیات بشخ ہلنگ ننا غٹ انا قومی فرض ءِ۔
