اسلام آباد۔ 12 جولائی (اے پی پی) وزیراعظم شہباز شریف نا پارت آتیا اسلام آباد و پنجاب نا چندی شار تا انتظامیہ شاری علاقہ غاتے ساف کننگ کن بھلو کچ اسے آ سفائی آپریشن نا بناءِ کریر ہرانا نتیجہ ٹی بھلا عئید انا وخت آ بنجائی دارالحکومت و پنجاب اٹی شاری تے ساف تخنگ اٹ کمک رسینگا۔ بھلا عئید انا وخت آ ساہدار تا فضلہ، آلائش و اوجری تے ٹھکانہ خلنگ مدام مشکل چیلنج اس مسنے ولے اینخو وزیراعظم شہباز شریف و وزیراعلیٰ پنجاب حمزہ شہباز شریف نا کماشی و راہشونی ٹی ضلعی انتظامیہ مقررہ کچرہ خسوک آ ہند آتیا ساہدار تا آلائش آتے جوان وڑاٹ ٹھکانہ خلکر۔ سالڈویسٹ مینجمنٹ کمپنیک ترک شریدار البراک کارپوریشن تون کمک کریر ہراڑآن صوبہ پنجاب نا غٹ بھلا شار تیٹی فضلہ غاتے یکجا کننگ و ٹھکانہ خلنگ نا گچین بست وبند کننگا۔ کمپنیک تینا فعال و متحرک عملہ نا کمک اٹ خاص وڑاٹ بھلا عئید انا وخت آ پنجاب نا چندی علاقہ غاتے ٹی فضلہ غاتے ٹھکانہ خلنگ کن گچین وڑوڈول اس اختیار کریر۔ بنجائی دارالحکومت اٹی ہم وزیراعظم شہباز شریف نا پارت آ ہندا وڑوڈول آ عملدرآمد کننگا۔ راولپنڈی و اسلام آباد نا نیام اٹ ہڑدے سفرکروک آ شاری جہانزیب اے پی پی ءِ پارے کہ شاری کمامدار آتا کنڈآن چندی علاقہ غاتیٹی آلائش آتے یکجا کننگ و ٹھکانہ خلنگ کن گچین کارروائی کننگانے۔ اوپارے کہ ہرسال ساہدار تا آلائش و کچرہ تا یکجا مننگ آن چاگڑ د اٹی بدبو و تعفن ودی مسکہ ولے اینخو شار انا چندی علاقہ غاتیٹی ٹیمک وخت آ ساہدارتا آلائش آتے یکجا کرسا ٹھکانہ خلکر۔ راولپنڈی نا ہنکینی علی پارے کہ ہر سال بھلا عئید انا وخت آ گلی و سڑک آتیا آلائش آتے خسنگاکہ ہراکہ انسانی جان جوڑی و قدرتی چاگڑد کن نسخان دہ ئسر ولے اینخو ویسٹ مینجمنٹ کمپنی و شاری کمامدار آک ساہدار تا آلائش آتا وخت آ بست وبند کریر ہراڑآن سڑک و شاہراہ تیا کچٹی نا خطرہ ءِ کم کننگ اٹ کمک رسینگا۔ اسلام آباد نا ہنکینی حنا پارے کہ شاری کمامدار آک آلائش آتے وخت آ ٹھکانہ خلسا غٹ ءِ حیران کرینو، بھلا عئید انا دے تیٹی شا ر صاف نظر بریک۔ شعبہ سینی ٹیشن نا کنڈآن اسلام آباد شار ءِ 4 جتا زون تیٹی بشخنگا ہرافتے ٹی 2000 آن زیات عملہ و 100 آن زیات جتا وڑنا پوسکن آ گاڈی فیلڈ اٹی 24 گھنٹہ ساڑی ئسر۔ بھلا عئید انا چھٹی تیٹی شاری تے گچین آسراتی تا فراوانی نا رداٹ کیپٹن ڈیولپمنٹ اتھارٹی نا شعبہ سینی ٹیشن نا کنڈآن ہیلپ لائن نمبر ز ہم جاری کرے ہرافتے آ شاریک چھٹی تیٹی ہروخت آ رابطہ کننگ کیرہ یا سفائی نا بابت باندات یا اوجری پین پین تے ہرفنگ کن سینی ٹیشن ہیلپ لائن نمبر 1334یا 9213908و ٹیل فون 9223171 9211555,9203216آ رابطہ ہم کننگ کیرہ۔
