اسلام آباد۔ 12 جولائی (اے پی پی) وزارت مذہبی امور و بین المذاہب ہم آہنگی نا کمامدار آک پارینو کہ کم وو د 82 ہزار پاکستانی حاجی تا حج کننگ آن پد حج مبارک آن پدی بننگ نا عمل پنچ شنبے نادے 14 جولائی آن بناکیک۔ اے پی پی تون گپ وتران کرسا کمامدار آک پاریر کہ حج آن پدی بننگ نا آپریشن 13 اگست اسکان بیدس وقفہ غان برجاسلک، وزارت مذہبی امور و بین المذاہب ہم آہنگی، سول ایوی ایشن و تعلقدار ایئر لائن تا کمامدار آک پدی بروک آ حاجی تا بالی پٹ آتیا اوفتے بخیر کیرہ۔ حاجی تے بالی پٹ آ سرمننگ آ فی حاجی پنچ لیٹر آب زم زم فراوان کننگک۔ پاکستان ءِ دا سال حج اکن 81132 حاجی تا کوٹہ جتا کننگا ہرافتیان 32 ہزار حاجی سرکاری اسکیم نا رداٹ و 48 ہزار نجی آپریٹر آتا کمک اٹ حج اکن گدریفنگا۔
