اسلام آباد۔ 12 جولائی (اے پی پی) ترجمان دفتر خارجہ پارینے کہ نائیجیریا ٹی برمتہ مروک پاکستانی شاری ڈاکٹر ابو ذر محمد افضل ءِ برمتہ گر آتیان رہائی ملانے، پاکستانی ڈاکٹر نا رہائی آ نائیجیریا نا حکومت و الس نا منت واراُن۔ دوشنبے نادے آ دفترخارجہ غان جاری بیان نا رداٹ وزارت خارجہ پارینے کہ ڈاکٹر ابو ذر نا رہائی ءِ ممکن کننگ آ نائیجیریا نا حکومت و الس نا منت وار اُن۔ ڈاکٹر ابو ذر برمتہ گر آتون تینا رہائی کن مذاکرات و رہائی نا کوشست کروک آ غٹ بندغ آتون پاکستان و نائیجیریا نا حکومت آتا ہم منت واری ءِ ہرفینے۔ ملتان نا ڈاکٹر ابو ذر نا خاہوت وزیراعظم پاکستان، وزیر خارجہ و وزیر مملکت خارجہ امور نا ہم منت واری ءِ ہرفینو۔ ڈاکٹر ابو ذر محمد افضل نائیجیریا ٹی اسہ شپنگ کمپنی اسے ٹی ملازمت کریکہ، 28 مارچ 2022 آ چندی مسافر آتون اوار اودے ہم یرغمال کننگاسس۔ برمتہ گر آتا کنڈآن اسہ تُو مست 13 یرغمالی تے رہا کننگاسس وخت اس کہ تدوک آ نن رہاکروک آ 7 یرغمالی تیٹی ڈاکٹر ابو ذر اسٹ انگا درملکی ءِ۔ وزارت خارجہ نا رداٹ ڈاکٹر ابوذر ءِ ابوجہ ٹی پاکستان ہائی کمیشن سفری دستاویز جاری کرینے او زوت نائیجیریا غان پاکستان کن روانہ مریک۔
