اسلام آباد۔ 12 جولائی (اے پی پی) پاک فوج انا سروک جنرل قمر جاوید باجوہ نا پارت آتیا پاک فوج انا غٹ کور ہیڈکوارٹر آک ملک انا چندی بشخ آتیٹی پِر، لینڈ سلائیڈنگ و دیر انا نکاسی کن سول انتظامیہ نا پبی کمکاری ٹی لگوک ءُ۔ مچ ا ملک اٹی ساڑی آ پِر تیان ودی مروک آ حالیت خاص وڑاٹ ملک انا چندی ہند آتیا پِر و چندی ہند آتیا اربن فلڈنگ نا حالیت آتون مون تننگ کن پاک فوج انا غٹ کور ہیڈکوارٹر آتے خصوصی پارت جاری کننگاسس کہ پِر تا ہلہلہ ئی حالیت آتون مون تننگ کن پورو تیار تخر و ریسکیو ریلیف و زیر آب علاقہ غاتے کلیئر کننگ کن انتظامیہ نا پبی کمک ءِ کننگے۔ کراچی ٹی 388ڈی واٹرنگ ٹیم پدریسہ زیر آب علاقہ غاتیٹی ڈی واٹرنگ اٹ لگوک ءُ۔ پاکستان آرمی، پاکستان رینجرز سندھ، ایف ڈبلیو او و این ایل سی نا ٹیمک پدریسہ انتظامیہ نا کمک ءِ کننگ ءُ۔ راولپنڈی /اسلام آباد زیات آن زیات پِر 21 ملی میٹر ریکارڈ کننگا۔ غٹ دریاو جل تیٹی دیر انا وہینگ ہڑدے نا رداٹ ءِ۔ راولپنڈی کور پدریسہ حالیت آتیا نظر تخانے و ہروڑنا ہلہلہ ئی حالیت آتون مون تننگ کن تیار ءِ۔ خیبرپختونخوا ٹی ٹانک و صوابی ٹی فلیش فلڈنگ ءِ۔ پشاور کور روڈ شندور چترال ءِ ٹریفک نا ہن و بر کن ملنگ اٹ سول انتظامیہ نا کمک ءِ کرینے۔ بلوچستان نا علاقہ لسبیلہ ٹی 400 بندغ ءِ نوکاپی دیر آن ریسکیو کننگا۔ کوئٹہ کور ہر ضلع ٹی اسہ رابطہ آفیسر اس مقرر کرینے ہراکہ پی ڈی ایم و سول انتظامیہ تون آپریشن اٹ لگوک ءِ۔ گلگت بلتستان نا علاقہ ٹی قراقرم ہائی وے، جگلوٹ سکردو روڈ و بابو سرشاہرائیں لینڈ سلائیڈنگ نا سوب آن بلاک مسوسر، ہرافتے ایف ڈبلیو و این ایچ اے ٹریفک کن بحال کرینے۔ ایف سی این اے ٹروپس ضلع غذر اٹی سول انتظامیہ نا کمک اٹ لگوک ءِ۔
