حکومت آبادی آ کنٹرول و قومی شونداری نا کچ اٹی ودکی کن پبی کوشست کننگ ءِ، وزیراعظم شہباز شریف

اسلام آباد۔ 11 جولائی (اے پی پی) وزیراعظم شہباز شریف پارینے کہ آبادی نا ودوک آ رفتار نا مون ءِ توننگ دنیا خاص وڑاٹ پدتموک آ ملک آتیکن اسہ بھلو چیلنج اسے ، وسیلہ و حق انا فراوانی و آبادی نا ودکی ٹی اسہ توازن اس ودی مننگ وخت انا اہم ءُ گرج اسے، دا سال جہانی دے آ ‘‘8 ارب آبادی نا دنیا، ہندن ءُ آخبت اس ہراٹی غٹ اکن وسیلہ، وارخواہی و حق انا فراوانی پک مرے’’ نا سرحال بھاز جوان ءِ۔ آبادی نا جہانی دے انا وخت آ وزیراعظم شہباز شریف تینا کلہو اٹی پارے کہ آبادی نا مون ءِ توننگ کرہ ارض انا ویل آتیٹی کمتی اتون زالبول آتا جان جوڑی ، تعلیم و زند انا بابت ہم بھاز اہم ءُ سرحال اسے، پدتموک ملک آتیٹی کم وئی نا برام، وسیلہ غاتا کمتی، مرض و لمہ غاتا مرک بھلو چیلنج ءُ، آبادی آ کنٹرول کن جہانی کہول آ اسیجائی کوشست آتا گرج ءِ۔ اوپارے کہ لمہ و چنا ءِ گچین درمان نا فراوانی ، ودی مننگ اٹی جوان وقفہ، خور و غذائیت نا کمتی نا چٹفنگ کون آ ویل آک اہم اولیت ءُ، ساڑی حکومت آبادی آ کنٹرول و قومی شونداری نا کچ اٹی ودکی کن پبی کوشست کننگ ءِ، دا ہڑتوم آ ہدف آتا دوئی کننگ آن بیدس جم قومی شونداری نا تغ پورو مننگ کپک۔