پائیدار و جوان راجی و اقتصادی شونداری کن آبادی نا بابت ویل آتے ایسر کننگ نا گرج ءِ، صدر عارف علوی

اسلام آباد۔ 11 جولائی (اے پی پی) صدر مملکت ڈاکٹر عارف علوی پائیدار و جوان راجی و اقتصادی شونداری کن آبادی نا بابت ویل آتے ایسر کننگ نا گرج آ زور شاغسا پارینے کہ خوشی ءِ کہ پاکستان و اقوام متحدہ نا باسک ملک آک آبادی نا بابت ویل آتا اہمیت ءِ تالان کننگ کن 1989 آن جہانی یوم آبادی اڈتننگ ءُ، نومبر 2022 اٹی دنیا نا آبادی 8 ارب اسکان سرمریک۔ جہانی یوم آبادی نا وخت آ تینا کلہو اٹی صدر مملکت ڈاکٹر عارف علوی پارے کہ دنیا ءِ نیزگاری، جان جوڑی نا ویل، ناخواندگی ، و انسانی حق انا خلاف ورزی کون آ ویل مون تروک ءِ، جنس، وئی ، نسل ، معذوری ، تپہ و مذہب آ مبنی تعصب آتا مون ءِ تورسا ویل آتے ایسر کننگ مریک۔ اوپارے کہ ایجنڈا 2030 نا مسخت آتے دوئی کننگ کن ننے تینا آبادی ٹی مروک آ بدلی تے پہہ مرسا اواری اٹ کاریم کننگ نا گرج ءِ، آبادیاتی بدلی نا منفی اثرآتے کم کننگ و وارخواہی تیان فائدہ ہرفنگ کن ننے حساب وکتاب آ مبنی یکتا و ردعمل اس تیار کروئی مریک۔ صدر مملکت پارے کہ پاکستان آبادی و راجی آبادی نا سرحال ءِ اولیت تسنے، آبادی نا بابت ویل آتا جوان ایسری کن اسیجائی مفادات کونسل صوبائی و علاقائی حکومت آتا سلابت اٹ سلاہ و سوج و نیشنل ایکشن پلان نا منظوری ءِ تسنے۔