اسلام آباد۔ 10 جولائی (اے پی پی) وزیراعظم محمد شہباز شریف ایران نا صدر سید ابراہیم رئیسی تون یک شنبے نادے آ ٹیل فون آ رابطہ کرے و اودے عئید انا مبارکبادی تننگ تون اوار اوار اوڑتون ہڑتوم آ کنڈآتا تعلقداری آ گپ وتران کرے۔ وزیراعظم پاکستان و ایران نا نیام اٹ جغرافیائی خڑکی، اسیجائی تاریخ و تین پہ تینی افہام و تفہیم آ مبنی تاریخی تعلقداری تا اہمیت ءِ تالان کرسا واپار، توانائی، بجلی و السی رابطہ غاتون اوار تین پہ تینی کمکاری نا غٹ بشخ آتیٹی ہڑتوم آ کنڈآتا تعلقداری تے مون آ دننگ کن تینا حکومت نا سوگو عزم انا درشانی ءِ کرے۔ اوپارے کہ اسیجائی اقتصادی کمیشن نا دیوان ءِ زوت بٹنگ آن ہڑتوم آ ملک آتا نیام اٹ اقتصادی رابطہ پین سوگو مریک۔ وزیراعظم دا اومیت نا درشانی ءِ ہم کرے کہ روزگار ءِ آسان کننگ کن سیمی علاقہ ٹی بارڈر اسٹیننس مارکیٹ آک زوت فعال مریرہ۔ وزیراعظم نواز شریف صوبہ بلوچستان اٹی جنگل آتا خاخر ءِ کسفنگ کن وخت آ کمک و آئی ایل 76 جہاز ءِ پاکستان ءِ تننگ آ ایرانی سرکڑدہ غاتا منت واری ءِ ہرفے۔ وزیراعظم محمد شہباز شریف ہر سال زائر آتا دورہ نا آسراتی کن ایران نا کمکاری نا ستاءِ کرسا الس نا نیام اٹ ہن و بر ءِ پین ودفنگ نا اہمیت آ زور شاغا۔ وزیراعظم جموں و کشمیر نا جھیڑہ غا ایران خاص وڑاٹ ایران نا سپریم لیڈر نا کنڈآن آخبت مخ تفی نا ستاءِ کرے۔ صدر سید ابراہیم رئیسی عئید انا مبارکبادی آ وزیراعظم نا منت واری ءِ ہرفے و ہڑتوم آ کنڈآتا واپار ءِ پین ودفنگ خاص وڑاٹ مکران ڈویژن ءِ بجلی نا فراوانی ٹی ایرانی نا باوری کرفے۔ وزیراعظم بڑزکو کہولی ہن و بر تا اہمیت آ زور شاغسا ایرانی صدر ءِ پاکستان نا دورہ نا سلہ خلک۔ ایرانی صدر سید ابراہیم رئیسی وزیراعظم محمد شہباز شریف ءِ زوت ایران نا سرکاری دورہ ءِ کننگ نا سلہ خلک۔
