اسلام آباد۔ 10 جولائی (اے پی پی) آصدر مملکت ڈاکٹر عارف علوی بھلا عئید انا مبارک و خوشی نا وخت آ مچ آ پاکستانی قوم و عالم اسلام ءِ مبارکباد پیش کرینے۔ بھلا عئید اناوخت آ قوم انا پن تینا کلہو اٹی اوپارے کہ اللہ تعالیٰ نا حضور دعا کیوہ کہ او پاکستانی قوم و مچ آ ملت اسلامیہ نا عبادت، حج و قربانی تے قبول کے۔ صدر مملکت پارے کہ بھلا عئید ننے اللہ تعالیٰ نا پرمان آ حضرت ابراہیم علیہ السلام و حضرت اسماعیل علیہ السلام نا تسلیم و رضا نا یات ترفک، دا عظیم شخصیت آتے اللہ تعالیٰ ہراتم امتحان آن گدریفے تو ہڑتوم آ ک اللہ نا پرمان ءِ امنا کریر۔ صدر مملکت پارے کہ اللہ تعالیٰ ءِ اوفتا دا جوزہ داخہ در وڑا کہ اودے قیامت اسکان ایمان والا تیکن عبادت نا حیثیت آن لازم گوندنگا۔ گویا کہ قربانی نا دا عبادت اللہ تعالیٰ نا بارہ گاہ ٹی مومن بندغ نا کنڈآن دا عزم انا درشانی ءِ کہ اونا کسر اٹ بھلا آن بھلو قربانی و ایثار کن او ہروخت تیار ءِ۔ اوپارے کہ قربانی و ایثار نا جوزہ عالمگیر و آفاقی تاثیر نا حامل ءِ، دنیا ٹی اسہ قوم اس ہم ہمووخت اسکان شون ہلنگ کپک ہراتم اسکان اوٹی ایثار و قربانی نا جوزہ ساڑی مف۔ ڈاکٹر عارف علوی پارے کہ قربانی بیرہ ساہدار تڑنگ نا پن اف بلکن دانا اسل مسخت نفسانی است خواہی تے بڑزکو مسخت آتا دوئی کننگ کن قربان کننگ ءِ، دا جوزہ انسان اٹی ہمو لائخی تے ودی کیک کہ ہرانا سوب آن او بھلا آن بھلا مشکل حالیت آتیٹی ہم راہ راست آن چپ مفک۔ اوپارے کہ وطن عزیز زرگزرانی وڑاٹ ہرا مشکل حالیت آتا گواچی ءِ اوٹی ننے ایثارو قربانی کون آ جوزہ غاتے کاریم اٹ اتنگ نا سخت گرج ءِ۔ بھلا عئید انا داوخت آ مچ آ پاکستانی قوم ءِ دا عزم انا درشانی ءِ کروئی ءِ کہ نن جندی فائدہ، جوفہ ،لالچ و خودغرضی نا جاگہ غا اخوت ، ایثار، مہرومریبت و غم خواری اٹ سرشار مرسا تینا دامون ایمون ضرورت مند و بے سیبو مخلوق نا کمک ءِ کین و آزمائشت نا دا ساہت اٹی سوگو ءُ قوم اس جوڑ مرسا مون آ برینہ۔
