کوئٹہ۔ 10 جولائی (اے پی پی) ڈپٹی اسپیکر بلوچستان اسمبلی سردار بابر موسیٰ خیل و چیف سیکرٹری بلوچستان عبدالعزیز عقیلی ئسک ہم عئید انا نماز ءِ گورنر ہاؤس اٹی خوانار داوخت آ ملک و قوم انا سلامتی و شونہالی کن خصوصی دعا خواہنگا۔ بھلا عئید انا نماز آن پد وزیراعلیٰ بلوچستان عبدالقدوس بزنجو و چیف جسٹس بلوچستان مخلوق تون عئید ملار و عئید انا مبارکبادی تسر ، وزیراعلیٰ بلوچستان میر عبدالقدوس بزنجو نا امت مسلمہ و اہل وطن ءِ بھلا عئید انا مبارکبادی پیش کرسا پارے کہ بھلا عئید انا وخت آ مسلمانک سنت ابراہیمی آ عمل کیرہ، بھلا عئید مسلمان تیٹی قربانی، انصاف ، رواداری ، بریبری تحمل مزاجی و ایثار نا جوزہ ودی کیک۔ وزیراعلیٰ بلوچستان پارے کہ اینو نا دے حضرت ابراہیم علیہ السلام و حضرت اسماعیل علیہ السلام نا عظیم قربانی تا یات ءِ تازہ کیک حضرت ابراہیم علیہ السلام اللہ تعالیٰ نا رضا کن تینا ہنین آ مار حضرت اسماعیل نا قربانی ءِ تننگ آن ہم پدی متو۔ اوپارے کہ اینو نا دے داہیت انا خواہندار ءِ کہ انسانیت ءِ مون آ دننگ کن تینا تہہ ٹی ایثار و قربانی نا جوزہ ءِ ودی کننگے، وزیراعلیٰ مستی پارے کہ قربانی ، صبر واستقامت نا جوزہ قوم تا مون آ دننگ و شونداری نا ضامن مریک تاریخ گواہ ءِ کہ ہمو قومک ہرافتے ٹی قربانی و ایثار نا جوزہ ساڑی مرے او ایلو قوم تیکن درور اس جوڑ مریرہ۔ وزیراعلیٰ بلوچستان الس آن خواست کرے کہ خوشی تا دا تہوار اٹی غریب، مسکین و راج انا نادار بندغ آتے ہم اوار کننگے۔ سخیک نوکاپ و پِر تا زہمی تا کمک ءِ کننگ کن مون آ بریر، اللہ تعالیٰ ننے سنت ابراہیمی نا فلسفہ ءِ سمجھنگ و داڑآ عمل کننگ نا توفیق عطاکے۔
