فیصل آباد۔ 10 جولائی (اے پی پی) بنجائی وزیر داخلہ رانا ثناء اللہ خان پارینے کہ تدوک آ چار سال ملک آ نابود ٹولی مسلط ئس ہرا ملکی زرگزرانی شونداری و الس ءِ آسراتی تا فراوانی نا جاگہ غا تینا غٹ چکار ءِ بیرہ مخالفت آتے لتاڑنگ و اوفتا برخلاف انتقامی کارروائی تیا تخا، ہندا وڑ عمران خان ملکی زرگزران نا بیڑہ ءِ غرق کرے ولے پاکستان داوخت آ زرگزرانی بابت اہم انگا دورآن گدرینگ انگ ءِ ہنداخاطرآن پاکستان ءِ اگہ نزور کننگا تو اونا اثر بھاز خراب مریک، ہنداخاطرآن آئی ایم ایف ءِ مرے کہ او دمدستی معاہدہ غاتے ایسر اسکان سرکے انتئے کہ نن تو آئی ایم ایف نا ہمو شڑت آتے ہم منان ہرافتا نن مخالفت ءِ کرینہ نن مشکل فیصلہ غاتے اٹ تینا جماعت کن ہم چندی ویل آتے بش کرین ولے سیاست آ ریاست ءِ اولیت تسن انتئے کہ اگہ نن ساڑی آ ابتر زرگزرانی حالیت آتیٹی آئی ایم ایف نا شڑت آتے منپروسن تو ملک ڈیفالٹ کریکہ۔ داہیت انا درشانی ءِ بنجائی وزیر داخلہ رانا ثناء اللہ خان یک شنبے نا سہب اتون فیصل آباد اٹی عئید انا نماز ءِ خواننگ آن پد تینا ڈیرہ غا میڈیا تون گپ وتران کرسا کرے۔ اوپارے کہ پاکستان کون آ ملک زیروسبسڈی نا معاہدہ ءِ ہراوڑ کننگ کیک انتئے کہ السی حالیت ءِ ہم مون آ تخوئی مریک ہنداخاطرآن نن الیکشن نا کنڈآن ہنتون تانکہ ملک ءِ ڈیفالٹ آن بچفنگ کین۔ اوپارے کہ ننتون مفتاح اسماعیل، احسن اقبال، شاہد خاقان عباسی، مصد ق ملک تون اوار دہ پانزدہ بھاز آزموندہ کار زرگزرانی و اقتصادی چاہندار آتا ٹیم اس ساڑی ءِ ہرا دے و نن وزیراعظم شہباز شریف نا کماشی ٹی ملکی زرگزرانی سوگوی، کبینی ٹی کمتی اتنگ و کم کٹیا والا بندغ آتون اوار غٹ الس ءِ ریلیف تننگ کن کوشست کننگ ءُ و داڑتون اوار اوار اوفتے گچین بیورو کریٹ آتا ہم پورو کمک و راہشونی دوئی ءِ۔ اوپارے کہ مسکوہی حکومت آئی ایم ایف تون ہرا معاہدہ غاتے کرینے اوڑآ آئی ایم ایف ننے تگنی نا ناچ ترفسا و ننا بامس اٹ لکیر کشفسا ہم خوش متو و اونا شڑت آک پورو متور۔
