اسلام آباد۔ 08 جولائی (اے پی پی) وزیراعظم شہباز شریف کشمیری حریت پسند برہان مظفر وانی ناشہیدی نا دے آ اودے خراج عقیدت پیش کرینے وپارینے کہ کشمیری تا جیرتی جہد ءِ سلام ءِ۔ وزیراعظم آفس نا پریس ونگ انا رداٹ وزیراعظم شہباز شریف پارے کہ برہان مظفر وانی بھارتی غاصبانہ کوزہ نا برخلاف کشمیری تا جیرتی مزاحمت نا استعارہ و نشانی جوڑ مسنے، تعلیم تون مہر و مریبت کروک آ ورنا برہان ءِ کوزہ گیر بھارتی فوج ناحق تنک کرے و کتاب ءِ پلسا توفک اس ہرفنگ آ بیوس کرے۔ وزیراعظم شہباز شریف پارے کہ برہان وانی قرآن خوانفوک آ لمہ ناجغر نا ٹکر و اسہ استاد اسے نا نرزور مار ئسک۔ برہان وانی بھارت نا ناروا کوزہ نا برخلاف بے مٹ جہد و عظیم قربانی اٹ حریت کشمیر نا اسہ پوسکن ءُ بشخ اس نوشتہ کرینے۔ ہراقوم اٹی برہان وانی کون آ شیر مارساڑی مرے، اودے 9 لکھ فوج تو انت مچ آ دنیا نا فوج اواری مرسا ہم غلام کننگ کپسہ۔ وزیراعظم پارے کہ نرزور کشمیری نسل درنسل تینا آزادی و بھارت نا ناروا غاصبانہ کوزہ نا برخلاف ہفت دہائی آن زیات وخت آن سینہ سپر ءُ ۔ جہانی برادری خاص وڑاٹ اقوام متحدہ سلامتی کونسل نا قرارداد آتیا عمل کرفے و مقبوضہ جموں و کشمیر نا الس نا است خواہی تا رداٹ استصواب رائے نا کمک اٹ کشمیر نا جھیڑہ ءِ ایسر کرفے۔ آزادی نا مزل دوئی مننگ اسکان پاکستان تیناکشمیری ایڑھ ایلم تا انصاف اٹ جہد نا ہرممکن مخ تفی ءِ کرسا کیک۔ اللہ تعالیٰ برہان وانی تون اوار غٹ شہید آتا درجہ غاتے بڑز ، خاہوت ءِ صبر وجمیل و اجر عظیم اس عطاکے۔ آمین
