اسلام آباد۔ 08 جولائی(اے پی پی) صدر مملکت ڈاکٹر عارف علوی گرین پریذیڈنسی ڈٹ انا رداٹ بجلی، دیر و گیس انا بچت نا گام گیج آتیا است جمی نا درشانی ءِ کرینے۔ ایوان صدر نا پریس ونگ آن جاری بیان اٹی پاننگانے کہ صدر مملکت عارف علوی نا کماشی ٹی ایوان صدر اٹی بجلی نا بچت نا بابت دیوان اس مس۔ دیوان اٹی پاننگا کہ ایوان صدر توانائی نا مد اٹی تدوک آ اِرا سال اٹی 10 کروڑ 80 لکھ روپئی نا بچت کرے۔ صدر مملکت عارف علوی پارے کہ ایوان صدر نا گرین ڈٹ مچ آ ملک اکن اسہ گچین ءُ درور اسے ، ایوان صدر پورو وڑاٹ 1 میگاواٹ نا شمسی توانائی نا ڈٹ آ چلینگ انگ ءِ، ایوان صدر تینا گرج آتے پورو کننگ آن بیدس 1 لکھ 12 ہزار یونٹ قومی گریڈ اٹی تس، ایوان صدر دنیا نا اولیکو آئی ایس او 50001سند شدہ صدارتی دفتر نا وڑاٹ جہانی درستی راستی دوئی کرے، توانائی نا ویل و موسمیاتی بدلی نا خطرناک اثرآتون مون تننگ کن غٹ ءِ تینا تینا کڑد ء ِ ادا کروئی مریک، صدر مملکت غٹ گورنر ہائوس ، یونیورسٹی و محتسب نا دفتر آتے شمسی توانائی آ گدریفنگ کن عملی گام گیج کننگ آ زور شاغا۔ صدر مملکت پارے کہ مچ آ ملک انا غٹ چیمبرز آف کامرس اینڈ انڈسٹری ہم تینا کاروبار و صنعت آتے شمسی توانائی آ گدریفر، شمسی توانائی آن پیدواری خڑچ کم مریک، ہندی مصنوعات و خذمت آتے قومی و جہانی منڈی تیٹی مسابقتی جوڑ کننگ مریک، ایوان صدر نا عملہ ءِ بجلی نا بچت نا بابت تینا کڑد ءِ ادا کننگ نا تعلیم تننگے۔ صدر مملکت پارے کہ ایوان صدر اٹی کاریم اٹ اتپروک آ الیکٹرانک آتے بند تخنگ، اے سی 26 ڈگری آ چلیفنگ و دیر انا بچت نا بابت پین گچینی اتنگک۔
