اسلام آباد۔ 08 جولائی (اے پی پی) سلاہکار و امور کشمیر و گلگت بلتستان قمر زمان کائرہ شہید کشمیری ورنا برہان مظفر وانی نا شش می کزیہ دے انا وخت آ شہید ءِ زبردست خراج عقیدت پیش کرینے۔ سلاہکار امور کشمیر و گلگت بلتستان قمر زمان کائرہ پارے کہ برہان مظفر وانی شہید مقبوضہ کشمیر اٹی بھارتی بربریت نا برخلاف مزاحمت نا اسہ بے مٹ ءُ نشانی اسے، برہان وانی مقبوضہ کشمیر نا خوانوک آ ورنا چین اٹی جہد نا اسہ پوسکن ءُ ساہ اس شاغا، داوڑ کون آ لکھ آ ورناک تینا حق خودارادیت نا دوئی کننگ کن سنبرینگوک ءُ۔ قمر زمان کائرہ پارے کہ کوزہ گیر بھارتی فوج کشمیری خاص وڑاٹ ورناتا بے تک کشت وخون ءِ کننگ ءِ، مقبوضہ دامان اٹی ہڑدے کودک کشمیری ورناتے پن انا سرچ آپریشن تیٹی شہید کننگک، بھارت 40 لکھ غیر ریاستی بندغ آتے مقبوضہ کشمیر نا شہریت تسنے، بھارت مقبوضہ کشمیر نا ڈیموگرافی ءِ بدل کرسا مسلمان گیشتری ءِ اقلیت اٹ بدل کننگ خواہک، غیرتی و نرزور کشمیریک بھارت نا دا چم آتے اسل سرسہب مننگ کن الیپسہ، پاکستان دنیا نا غٹ فورم تیا تینا کشمیری ایڑھ و ایلم تا پبی مخ تفی ءِ برجاتخانے۔ قمر زمان کائرہ پارے کہ بلاول بھٹو زرداری کشمیر نا ویل ءِ دنیا نا غٹ فورم تیا پبی وڑاٹ تالان کننگ ءِ۔
