کوئٹہ۔ 07 جولائی (ا ے پی پی) بلوچستان نیشنل پارٹی نامرکزی سیکرٹری حوالکاری بنجائی وزیر سائنس و ٹیکنالوجی آغاحسن بلوچ نوشکی ٹی پِر آن زہمی کلی جورکین نا علاقہ غاتا دورہ ءِ کرے۔ داوخت آ اوڑتون اوار پارٹی نا مرکزی ایگزیکٹیو کمیٹی نا باسک میر خورشید احمد جمالدینی ، بی این پی کوئٹہ نا راہشون اسد سفیر شاہوانی و بی این پی نوشکی نا ضلعی عہدیدار رمضان بلوچ ، حاجی منیر احمد مینگل ، لیاقت علی ایڈووکیٹ، صاحب خان مینگل ، ڈاکٹر محمد عمر ماندائی آن بیدس ڈپٹی کمشنر نوشکی خالد خرم و میجر بہرام خان مینگل ئسک ہم ساڑی ئسر۔ بی این پی جورکین آن پوسکن گچین مروک آ کونسلر مسعود احمد جمالدینی نا پیدواری آ بنجائی وزیر آغا حسن بلوچ زہمی علاقہ غاتا دورہ ءِ کرے ، ہائی اسکول جورکین آ سرمننگ آ ہیڈ ماسٹر بشیر احمد بنجائی وزیر و ایلو مہمان تے بخیر کرے۔ اوطوفان آن اسکول نا تموک آ چار دیوالی نا معائنہ ءِ کرفے و واٹر ٹینک و سولر پلیٹ آتا پِننگ نا بابت حوال تس۔ السی نمائندہ و کلی نا بندغ آک ہنکینی ہند و اوفتا چار دیوالی تا تمنگ، کیسکو نا کھمبہ غاتا زہمی مننگ ، سڑک آتا زہمی مننگ، آبنوشی اسکیم نا سولرپلیٹ آتا پِننگ نا سوب آن کنوئی دیر انا ناپید مننگ و غٹ آن زیات زمیندار آتا سولر پلیٹ آتا پِننگ و تیار فیصل آتے دیر دننگ نا سوب آن علاقہ ءِ آفت زدہ گوندنگ و دمدستی وڑاٹ کمکی گڑا سرکننگ نا خواست کرے۔ بنجائی وزیر ڈپٹی کمشنر نوشکی خالد خرم ءِ دمدستی وڑاٹ غٹ محکمہ غاتا ضلعی سروک آتے بٹنگسا اوفتے زہمی علاقہ غاتا دورہ ءِ کننگ و نسخان تا سرجم رپورٹ اس پیش کننگ نا پارت کرے تانکہ دمدستی وڑاٹ نیشنل ڈیزاسٹر مینجمنٹ اتھارٹی آن زہمی تے کمک ملنگ کے۔ بنجائی وزیر آغا حسن بلوچ زہمی بندغ آتے باور کرفے کہ زوت آبنوشی اسکیمءِ فعال کننگک و ایلو نسخان تا ازالہ نا ہرممکن کوشست کننگک۔
