اسلام آباد۔ 07 جولائی (اے پی پی) وزیراعظم شہباز شریف پارینے کہ قوم تدوک آ چار سال اٹی الس نا آسراتی ڈٹ آتیٹی تاخیر نا ورندی ءِ خواہک ، مستین نا ڈیوالئی تا ازالہ ءِ کننگ نا وخت بسنے، غٹ ادارہ غاک دے و نن کاریم کیر، مستین اٹ ہیبدار ڈٹ بندی و ٹینڈرنگ آن قومی خزانہ ءِ نسخان تننگا، داسہ ڈیوالئی ءِ سگنگ پننگک، شمسی توانائی نا کمک اٹ الس ءِ کبین بجلی آن بچفنہ، پنجاب حکومت نا 100 یونٹ اسکان کاریم اٹ اتوک آ اُراتے مفت بجلی فراوان کننگ انقلابی ءُ گام گیج اسے ، روات آن کورال ایکسپریس وے انا تفنگ کن فنڈ ایتنہ۔ داخیال آتا درشانی ءِ او پنچ شنبے نادے آ اسلام آباد اٹی ٹرانسپورٹ نا پوسکن آ نظام نا رداٹ میٹروبس سروس نا گرین لائن و بلیو لائن بس سروس نا بنائی دود آن تران کرسا کرے، داوخت آ بنجائی وزیر حوالکاری و شینکاری مریم اورنگزیب ، بنجائی وزیر داخلہ رانا ثناء اللہ آن بیدس چیئرمین سی ڈی اے و تعلقدار ادارہ غاتا بڑزکو کمامدارآک ہم ساڑی ئسر۔ وزیراعظم دود آن تران اٹی پارے کہ کنے خوشی ءِ کہ اینو جاڑ انگا شار تا ایلم، ایڑھ ، بزرگ ، چناک، طالب علم ، استاد ، خواری کش ، ڈاکٹر آتون اوار زند انا ہر بشخ آن تعلق تخوک آ الس ءِ اسہ گچین و السی سفری آسراتی اس دو بسنے۔ اوپارے کہ دنیا ٹی تیل و گیس انا نہاد آک آسمان تون ہیت کننگ ءُ، اللہ نا شکر ءِ کہ ساڑی آ دے تیٹی نہاد آتیٹی گڑاس کمتی بسنے، تیل و گیس انا نہاد آتیان دنیا نا کروڑ آ ارب مخلوق زہمی مسنے و دا کبینی نا دور اٹی ہرانا چرجوئی چارسال آن برجاءِ لس بندغ کن وخت ءِ تیر کننگ بھاز مشکل مسنے و او مشکل اٹ تینا چناتے پڈ ءِ ولفرہ، داوڑاٹ دا السی سفری آسراتی اسہ گچین ءُ گام اسے۔ وزیراعظم پارے کہ دا سفری آسراتی آن قرب وجوار نا الس ءِ ہم بھاز فائدہ مریک و او عزت اٹ وخت آ تینا مزل آ سرمننگ کیرہ۔ اوپوسکن آ بس سروس نا ڈٹ آ دے و نن کاریم کننگ آ وزیر داخلہ و تعلقدار ادارہ غاتا کمامدارآتے شاباشی تس و پارے کہ او ترند رفتاری اٹ دا ڈٹ آ کاریم کرینو۔ وزیراعظم پارے کہ تدوک آ چار سال اٹی السی آسودہی ڈٹ آتیٹی ہرا تاخیر مس قوم اونا ورندی ءِ خواہک۔ داسہ مستین اٹ مروک آ تاخیر تا ازالہ ءِ کننگ نا وخت بسنے غٹ محکمہ غاک پبی خواری کیر و ڈکھیائی انسانیت نا خذمت کن د ے ونن ءِ اسٹ کیر۔ وزیراعظم پارت کرے کہ اسہ تُو اکن گرین و بلیو لائن بس سروس نا کمک اٹ مفت سفری آسراتی فراوان کننگے تانکہ کبینی ٹی اختہ مروک الس ءِ گڑاس ریلیف رسینگے۔ اوای کارڈ انا بناءِ دمدستی وڑاٹ بناکننگ نا ہم پارت کرے تانکہ چندی روٹ آتیکن مسافر آتے جتا جتا کارڈ ہلوئی تمپ۔ اوپارے کہ دا بس سروس اٹ ہراتم ہزگار و نیزگار یکجا سفر کیرہ تو داڑآن طبقاتی پرخ ہم چٹک۔ وزیراعظم پارے کہ داوخت آ نن بھاز کبین بجلی جوڑ کننگ آ بیوس اُن، تیل انا نہاد آتیٹی گڑاس کمتی بسنے نن دعا کین کہ داٹی پین کمتی برے تانکہ الس ءِ بجلی و گیس اڑزآن تننگ مرے۔ وزیراعظم پارے کہ الس کبینی آن تباہ حال ءِ، اللہ ننا کمک ءِ کے و اوفتے کن حالیت آتیٹی گچینی بریک۔ اینو دا بابت جوان ڈٹ اس ٹہیفنگ انگ ءِ ، کشاری مسخت و سرکاری دفتر بشمول اسکول، ہسپتال آتا ماڑی تیکن شمسی توانائی نا جال اس تالان کینہ تانکہ کبین بجلی آن گلوخلاصی مرے۔ وزیراعظم پارے کہ ننے مجبورا سالانہ 20 ارب ڈالر نا تیل و گیس درآمد کروئی تمک۔ اوداہیت آ است ہسونی نا درشانی ءِ کرے کہ 75 سال اٹی دُن بھاز گڑاس حکومت آک گچین کاریم کریر ولے بحیثیت جم نن قرب و جوار نا ملک آتا مقابلہ ٹی گچین کارکڑد نا درشانی ءِ کننگ کتون و دنگ اٹ پیری کننگ اُن۔ وزیراعظم پارے کہ پنجاب حکومت نا 100 یونٹ اسکان بجلی کاریم اٹ اتوک آ اُراتے مفت بجلی فراوان کننگ نا گام گیج انقلابی ءِ داڑکن صوبائی حکومت 100 ارب نا بجٹ تخانے ہراڑآن 5 کروڑ 40 لکھ مخلوق ءِ فائدہ مریک۔ اوداگمان نا درشانی ءِ کرے کہ ایلو صوبہ غاک ہم السی راجی آسراتی کن گچین ءُ فیصلہ کیرہ۔ وزیراعظم اسلام آباد پولیس کن وزیر داخلہ نا کنڈآن کروک آ گام گیج آتے ستاکڑزوک گوندسا پارے کہ اونا پنجاب اٹی امن و ایمنی کن کاریم کننگ نا دہ سال نا آزموندہ ءِ او اسلام آباد اٹی ہم گچین کاریم کننگ ءِ و اسلام آباد پولیس کن ہراگام گیج و پیکج آتا او پڑو کرینے اوفتا پبی تائیدءِ کیوہ، وزیراعظم روات آن کورال اسکان ایکسپریس وے انا تفنگ کن فنڈ مہیا کننگ نا ہم پڑو کرے و پارے کہ ڈٹ آک قوم انا امانت ءُ ، بدبختی اٹ السی آسراتی نا ڈٹ آتے ہمو ٹھیکیدار آتا دوٹی تننگا ہرافتا ہچ ءُ آزموندہ اس الوکہ، ہیبدار ڈٹ بندی و ٹینڈرنگ آن قومی خزانہ ءِ نسخان ترسا اسہ قومی ڈوہ اسے نا ارتکاب کننگا، اوخبڑدار کرے کہ اگہ پین وخت اس کس اس السی خذمت نا ڈٹ آتا تفنگ کن بے آب اٹ ٹینڈرنگ کرے تو زموارآتا خیر اف، نیزگار الس نا اسہ اسہ پائی ءِ بچفوئی ءِ ، اوداعزم انا درشانی ءِ کرے کہ نواز شریف و سیوتی جماعت آتا سرکڑدہ غاتا کماشی و راہشونی ٹی سیوتی حکومت پاکستان ءِ مشکل آتیان کشک و ملک ءِ شونداری و شونہالی نا سفر آ دیک۔ داوخت آ وزیراعظم بلیو و گرین لائن بس نا بناءِ کرے و گرین لائن اٹی سفر ہم کرے۔ وزیراعظم ءِ ڈٹ انا بارواٹ سرجم حوال تننگا ، چیئرمین سی ڈی اے عامر احمدعلی پارے کہ بہارہ کہوآن پمز اسکان نا سفر 45 منٹ اٹ طے مریک، بہارہ کہو روٹ آ ہر دہ منٹ پد وخت اس کہ کورال آن ہر شش منٹ آن پد بس روانہ مریک۔ داکان مست وزیراعظم میٹرو بس آپریشن کمانڈ اینڈ کنٹرول سینٹر نا ماڑی نا بنداو ءِ ہم تخا۔
