اسلام آباد۔ 06 جولائی (اے پی پی) بنجائی وزیر داخلہ رانا ثناء اللہ پارینے کہ عمران خان کل ءِ گڑاتے پاننگ خواہک تو پائے کہ 2014 ٹی دِنا پاننگ آ دھرناتس، 50 ارب الس نا ڈبفسا 5 ارب نا میرات جوڑ کننگ و بشیر میمن نا سوج آتا انت ورندیک ءُ، عمران خان ءِ اسل ویل دادے کہ او اقتدار اٹی اف، عمران خان نا ہیت آتیان پیدوار ءِ کہ او این آر او خواہنگ ءِ، اونا حواری تیان سوج کننگے تو او غداری ءِ، مستین اٹ عمران خان ایسٹس ریکوری سیل انا آڑاٹ انتقامی کارروائی کریکہ، داسہ او حوصلہ تخے ، ہرادروغ انا کیس جوڑ کرسا کرینے داسہ اودے سچا کیس آتون مون تننگ نا ہمت اف، توشہ خانہ غان 15 درسد جمع کرفسا15 آن 20 کروڑ نا گھڑی تے دُزی کروک آ امر صادق و امین مننگ کیک، آڈیو یا ویڈیو ریکارڈنگ اس کس اسے نا ڈوہ یا مجرمانہ فعل ءِ پک کننگ کن کننگک، او ڈوہ اس اف، اگہ کس اسے بلیک میل کننگ کن کننگے تو غلط ءِ۔ او چارشنبے نادے آ پی ٹی وی ہیڈکوارٹر اٹی پریس کانفرنس آن تران کریکہ۔ بنجائی وزیر رانا ثناء اللہ پارے کہ تدوک آدے عمران خان اسہ ویڈیو اس جاری کرے کہ ننے زیزار، تنگ کننگ انگ ءِ و دیوال تون خلنگ انگ ءِ، اگہ دا چرجوئی بند متو تو ای ہمو غٹ ءِ پاوہ، اولیکو ہیت تو دادے کہ نی پا کہ نے ہراوڑ زیزاریفنگ انگ ءِ، انت نا برخلاف مقدمہ جوڑ کننگ انگ ءِ یا کوٹ لکھ پت زندان اٹی بند، دوائی بند و اُراغان کن وخور نا آسراتی تفننگ انگ ءِ۔ اوپارے کہ تدوک آ مسہ نیم سال عمران خان تینا مخالف آتون دا کل ءِ کرسا کرینے، نیتون تو دُن ءُ ہچ اس متنے۔ اوپارے کہ داسوج کننگ کہ داقوم انا 50 ارب نا نغڑدفنگ کن 5 ارب نا میرات تینا اُرائی، 240 کنال بنی گالہ ٹی فرح نا پن آ جاگہ ہلک، انت دا معلومداری ہلنگ یا سوج کننگ آن نی تنگ مننگ اُس، اوفتا نے ورندی ءِ تروئی مریک۔ اوپارے کہ اگہ قوم ءِ غٹ گڑاتا پاننگ اٹ لگوک اُس تو داہم پا کہ ن لیگ دور حکومت اٹ دھرنا دِنا پاننگ آ تسوسس، فرح گوگی و مچ آملک اٹی گوگے ہرا لٹ و پل ءِ کریرہ اوفتیان بیرہ سوج کننگ انگ ءِ، ہرسال 700 آن 1100 ارب نا شونداری فنڈ آن 5 درسد ٹی کے صاحب ءِ ہنسا کرینے ، اوہرافک ئسر ہرا بنی گالہ نا رہینگوک تکنگارہ، ہرافتا ہن و بر نا ریکارڈ اف، توشہ خانہ نا ہم ورندی ءِ تروئی مریک۔ وزیر داخلہ رانا ثناء اللہ پارے کہ بشیر میمن ہرا سوج آتے کریسس، اوفتا ورندی تیان بیدس عمران خان ہر ہیت ءِ کننگ ءِ ولے اوفتا ورندی ءِ تفننگ ءِ۔
