اسلام آباد۔ 05 جولائی (اے پی پی) وزیراعظم شہباز شریف اسلام آباد نا کورنگ نالہ ٹی نوکاپی لہر تیٹی اختہ چار کم سن چناتے بچفنگ آ ریسکیو ٹیم تا کارکڑد انا ستاءِ کرسا پارینے کہ پاک بحریہ، اسلام آباد نا ضلعی انتظامیہ ، پولیس و ریسکیو 1122 نا عملہ فرض شناسی نا بھاز جوان ءُ درور اس قائم کرینو۔ سے شنبے نادے آ وزیراعظم میڈیا آفس آن جاری اسہ بیان اسے نا رداٹ وزیراعظم پارے کہ طوفانی نوکاپی ریلہ ٹی ریسکیو نا عملہ ہرا جانفشانی ، چابکدستی، مہارت و دلیری نا درشانی ءِ کرینے اوڑآ اوفتے خراج تحسین پیش کیوہ۔ اوپارے کہ موسمی حالیت آتیٹی لمہ باوہ تینا چناتا رکھ انا بابت زمواری تا درشانی ءِ کیر، اللہ نا شکر ءِ کہ ہچ ءُ حادثہ اس متو۔ وزیراعظم پارے کہ راولپنڈی تون اوار مچ آ ملک انا ضلعی انتظامیہ، پولیس و ریسکیو ٹیمک اسلام آباد نا ٹیم انا درور نا تقلید ءِ کیر، داواقعہ غٹ اکن درور اسے کہ اگہ نن ہنداوڑ ٹیم ورک ، خواری اٹ کاریم کینہ تو انشاء اللہ مشکل آتا طوفانی ریلہ غاتیان سرسہب مرسا پیش تمنہ۔ اوپارے کہ طوفانی پِر و نوکاپی حالیت آتیٹی قومی و انسانی ہمدردی نا جوزہ اتون تینا اہل وطن نا کمک ءِ کیر۔
