اسلام آباد۔ 05 جولائی (اے پی پی) صدر مملکت ڈاکٹر عارف علوی ورناتے پوسکن آ تعلیم نا زیورآن شپ کننگ نا گرج آ زورشاغسا پارینے کہ اسہ پورو انسان اسے کن تعلیم تون تربیت ہم المی ءِ۔ صدر مملکت داخیال آتا درشانی ءِ سے شنبے نادے آ غلام اسحاق خان انسٹیٹیوٹ نا 26 می کانووکیشن آن تران کرسا کرے۔ اوپارے کہ جامعہ و راج اخلاقیات و قدر آ خصوصی چکار تخر، ننے تینا تعلیمی نظام ءِ گچین آن گچین کننگ آ تینا چکار ءِ کروئی مریک۔ صدر پارے کہ انسانی وسیلہ وذہن تا شونداری علم اتون گنڈوک ءِ، طالب علم آک تعلیم تون اوار اوار رابطہ و زبان و بیان نا لائخی تیٹی ودکی آ خاص چکار تخر۔ صدر ڈاکٹر عارف علوی پارے کہ زمانہ ٹی ترندی اٹ شون ہلوک آ بدلی تے پہہ مروئی مریک، ٹیکنالوجی نا کمک اٹ علم اسکان رسینگ ودانے۔ اوپارے کہ انسان نا جاچکاری و فیصلہ سازی نا لائخیک بنداوی اہمیت اس اختیار کرینو، قدرتی وسیلہ غاتا نسبت انسانی و فکری وسیلہ غاتا ہمیت ودانے۔ صدر مملکت پارے کہ ساڑی دور اٹی علم شونداری نا اسٹ انگا کسر ءِ ، پاکستان ءِ کسبکار و تربیت یافتہ انسانی وسیلہ غاتا سخت گرج ءِ، جامعہ غاک آب اٹ انسانی وسیلہ غاتا زیات کچ ودی کیر۔ صدر پارے کہ انفارمیشن ٹیکنالوجی نا بشخ اٹی پاکستان سالانہ کم و ود 30 ہزار طالب علم ودی کیک، کسبکار ورناک آن لائن خذمت آتا کمک اٹ روزگار کٹیا کننگ ءُ۔ ڈاکٹر عارف علوی پارے کہ پاکستان ءِ اخلاقیات نا لحاظ اٹ ہم برتری دوئی ءِ، پاکستان 40 سال اسکان 40 لکھ اوغان باہوٹ آتے پناہ تس، پاکستان اٹی زمی جمب و نوکاپ نا حالیت اٹی الس زیات آن زیات آسودہی کاریم تیٹی بشخ شاغرہ۔ صدر مملکت پارے کہ سرکڑدہ غاتا کنڈآن سہی فیصلہ سازی نا گرج ءِ، فیک نیوز و غیبت نا بایدے حوصلہ شکنی ءِ کننگے، سرسید احمد خان ، علامہ اقبال و قائد اعظم ننے بحیثیت قوم بش کریر۔ صدر مملکت پارے کہ پاکستان نا شونداری کن جمہوریت، واپار و جوزہ نا گرج ءِ۔ اوپارے کہ طالب علم آتیا راج انا شونداری و راجی آسراتی نا خصوصی زمواری اس عائد مریک۔
