لاہور ۔ 04 جولائی (اے پی پی) وزیراعظم شہباز شریف پارینے کہ زرگزرانی وڑاٹ غیر معمولی حالیت آتیٹی صنعتی و برآمدی بشخ انا ہرممکن کمک آن پاکستان نا برآمدی مصنوعات آتے جہانی مارکیٹ اٹی گچین وڑاٹ پیش کننگ مریک، بیرہ گیس آ چلینگوک آ کارخانہ غاتیکن گیس لوڈ شیڈنگ نا پالیسی آ نظر ثانی کننگے تانکہ برآمد آتا پیدواری فراوانی ءِ پک کننگ مرے۔ وزیراعظم آفس میڈیا ونگ آن جاری بیان نا رداٹ وزیراعظم شہباز شریف نا کماشی ٹی ملک اٹی زرکاری نا مون آ دننگ اٹ کمکار انڈسٹریل و برآمد بشخ انا ویل آتا ایسری کن جاچ دیوان اس اڈہلک۔ دیوان اٹی بنجائی وزیر انرجی ڈویژن انجینئر خرم دستگیر، بنجائی وزیر زرکاری بورڈ چوہدری سالک حسین، بنجائی وزیر کامرس سید نوید قمر، بنجائی وزیر انڈسٹریز سید مرتضیٰ محمود، وزیر مملکت پیٹرولیم مصدق ملک، قومی اسمبلی نا باسک شاہد خاقان عباسی، صوبائی وزیر کانود ملک احمد خان، تعلقدار وزارت آتا بڑزکو کمامدار و ٹیکسٹائل سیکٹر نا پنی آ کاروباری شخصیت آک بشخ ہلکر۔ وزیراعظم شہباز شریف انڈسٹریل و خاص وڑاٹ ٹیکسٹائل سیکٹر نا انرجی سپلائی نا ویل آتے اولیتی بنداو تیا ایسر کننگ کن بزنس مین نا نمائندہ ٹولی ءِ تعلقدار وزیر آتون دمدستی وڑاٹ اوڑدہی ٹی ویل آتیا سرجم گپ وتران کننگ نا پارت کرے۔ وزیراعظم شہباز شریف پارے کہ پاکستان نا انڈسٹریل و برآمدی سیکٹر نا ویل آتا موافق و موضوع گام گیج آتا کمک اٹ دمدستی ایسری ٹی پاکستان نا زرگزرانی بقاء پوشیدہ ءِ۔ وزیراعظم شہباز شریف پارے کہ زرگزرانی وڑاٹ غیر معمولی حالیت آتیٹی انڈسٹریل و برآمدی سیکٹر نا ہرممکن کمک اٹ پاکستان نا برآمدی مصنوعات آتے جہانی مارکیٹ اٹی گچین وڑاٹ پیش کننگ مریک۔ وزیراعظم شہباز شریف بیرہ گیس آ چلینگوک آ کارخانہ غاتیکن گیس لوڈشیڈنگ نا پالیسی آ نظرثانی نا پارت کرے تانکہ برآمد آتا پیدواری فراوانی ءِ پک کننگ مرے۔
