اسلام آباد۔ 04 جولائی (اے پی پی) بنجائی وزیر قومی جان جوڑی عبدالقادر پٹیل ملک اٹی کورونا دین انا تالانی آ گڑتی نا درشانی ءِ کرسا پارینے کہ تدوک آ 24 گھنٹہ ٹی مثبت کیس آتا کچ 4.6 مسنے و ہسپتال آتیٹی 176 ناجوڑ آتا ودکی مسنے۔ دوشنبےنادے آ داڑے پریس کانفرنس کرسا اوپارے کہ داحالیت آتیا خلوئی اف بلکن احتیاط نا گرج ءِ۔ حکومت مہالو آن کورونا غان بچفنگ نا ایس او پی جاری کرینے، دا ایس او پی تیا عملدرآمد ءِ پک کننگک۔ اوپارے کہ سندھ اٹی کیس آتا کچ اٹی ودکی مسنے، حکومت سندھ اتون دا چرجوئی ٹی ہیت مسنے، کیس آتا زیات کچ کراچی آن مون آ بسنے۔ اوٹیسٹنگ آ زور شاغسا پارینے کہ بوسٹر ڈوز انا عمل ءِ ترند کننگ نا فیصلہ کننگانے، نن مہالوآن 10 لکھ انا کچ ءِ سرمننگ اُن۔ بنجائی وزیر پارے کہ ہڑدے ئی بنداو آ این سی او سی نا دیوان اٹی کورونا نا حالیت آتا جاچ ءِ ہلنگک۔ اوپارے کہ صوبہ غاتے پاننگانے کہ او تینا آسراتی تے تیارتخر، ملک اٹی اِرا بھلو مذہبی اجتماع بھلا عئید و محرم بننگ ءُ، چھٹی تیٹی سیل و سواتی ہند آتیا رش انا رجحان مریک۔ اوالس آن خواست کرے کہ داوخت اٹی سوشل ڈسٹنسنگ نا خیال ءِ تخر، ماسک بینر و سینیٹائزر ءِ کاریم اٹ اتیر۔ ننے خلینگ نا جاگہ غا احتیاط اٹ کاریم ہلوئی ءِ، الس اٹ کورونا نا بابت پین شعور بیدار کننگ نا گرج ءِ تانکہ مخلوق دامرض آن بچنگ کے۔ بنجائی وزیر پارے کہ تدوک آ بیست ءُ چار گھنٹہ ٹی مثبت کورونا کیس آتا کچ 4.6 مسنے وخت اس کہ ہسپتال آتیٹی 176 پوسکن ءُ مریض داخل مسنو ہراکہ گڑتی نا ہیت اسے۔ اسہ سوج اسے آ اوپارے کہ نن بازار تے بند کننگ نا ہم پاتوین و ننا است خواہی ءِ کہ نئے داوڑءُ نوبت اس برے۔ اسہ پین سوج اسے آ او پارے کہ ہسپتال آتیٹی وینٹی لیٹر گرج انا رداٹ ساڑی ءِ، این سی او سی نا دیوان اٹی داڑآ پین سجفنگک۔ اسہ پین سوج اسے نا ورندی ٹی بنجائی وزیر قومی جان جوڑی پارے کہ پمز ہسپتال اٹی انجیکشن آن ناجوڑ اسے نا زہمی مننگ ناحوال کنے اسکان سرمسنے ، اوڑآ زموار بندغ آک حالیت آتے ہُننگ ءُ و بروک آ چار پنچ گھنٹہ ٹی رپورٹ مون آ بریک۔
