اسلام آباد۔ 04 جولائی (اے پی پی) چیئرمین سینیٹ محمد صادق سنجرانی پارینے کہ بلوچستان نا طالب علم آک تعلیمی و پٹ وپولی سرجزآتیٹی زیات آن زیات بشخ ہلنگ ءُ ہرانا اثر ملک انا جم راجی و اقتصادی شونداری آ تمک، ولے دا بھاز المی ءِ کہ بلوچستان نا مر مر انگا علاقہ غاتیان تعلق تخوک آ طالب علم آتا ویل آتے اولیتی بنداو تیا ایسر کننگے۔ سینیٹ سیکرٹریٹ نا رداٹ داخیال آتا درشانی ءِ او سیکرٹری انسانی حق افضل لطیف تون گپ وتران کرسا کرے ہرا اوڑتون دوشنبے نادے آ اوڑدہی کرے۔ چیئرمین سینیٹ ءِ سیکرٹری انسانی حق طالب علم آتا ویل آتا ایسری کن کروک آ گام گیج و خصوصی وڑاٹ جوڑ کروک آ کمیشن نا کاریم و دا چرجوئی ٹی مروک آ پیش رفت نا بارواٹ معلومدار کرے۔ محمد صادق سنجرانی پارے کہ کمیشن نا رپورٹ ءِ گڈیکو دروشم اس تننگ کن سلابتی عمل ءِ ترند کننگے تانکہ بلوچ طالب علم آتے ریلیف فراوان کننگ مرے و اوفتا غاوتا ازالہ مننگ کے۔ چیئرمین سینیٹ پارے کہ بھلا عئید انا چٹھی تیان پد دا مچ آ عمل آ حوال ہلنگک۔ اوپارے کہ تعلیم اسہ بنداوی ءُ حق اسے و داڑکن طالب علم آتا اوروا ویل آتا ایسر مننگ بھاز اہم ءِ ہرااوفتے دا بنداوی حق اسکان رسینگ اٹ اڑاند شاغرہ۔ سیکرٹری انسانی حق افضل لطیف چیئرمین سینیٹ ءِ داتم اسکان نا مروک آ پیش رفت آن معلومدار کرے۔ اوپارے کہ وزارت سنجیدگی اتون بلوچستان نا طالب علم آتا ویل آتا ایسری کن کوشست کننگ ءِ و خصوصی کمیشن نا رپورٹ ءِ زوت گڈیکو دروشم اس تننگک۔
